Welcome to Qashqadaryo viloyat statistika boshqarmasi   Click to listen highlighted text! Welcome to Qashqadaryo viloyat statistika boshqarmasi Powered By GSpeech

Qashqadaryo viloyat statistika boshqarmasida “Call centre” tashkil etilgan. Murojaat uchun telefon: (+998 75) 221-16-42.

Welcome to Qashqadaryo viloyat statistika boshqarmasi   Click to listen highlighted text! Welcome to Qashqadaryo viloyat statistika boshqarmasi Powered By GSpeech
Click to listen highlighted text! Powered By GSpeech

QASHQADARYO VILOYAT TARIXI

KORRUPSIYAGA QARSHI KURASH

TADBIRKORLAR UCHUN

Oʻzbekiston Respublikasi Prezidenti Shavkat Mirziyoyevning Namangan viloyatiga tashrifi boshlandi. Davlatimiz rahbari dastlab Pop tumanida barpo etilgan “Nuran uz” meva-sabzavotchilik klasteri faoliyati bilan tanishdi.

Pop Namangan viloyatining hududi jihatidan eng katta tumani. Prezidentimizning foydalanishdan chiqib ketgan qishloq xoʻjalik yerlarini oborotga qaytarish toʻgʻrisidagi tegishli qaroriga muvofiq, tumandagi unumsiz toshloq yerlarni oʻzlashtirish boʻyicha dastur ishlab chiqildi.

Ushbu dasturga asosan “Nuran uz” masʼuliyati cheklangan jamiyati tomonidan Pop tumanidagi adirliklardan iborat 1 ming 885 gektar oʻzlashtirilmagan yerda meva-sabzavotchilik klasteri tashkil etildi. Joriy yilning bahorida bu yerda 100 gektarga oʻrik, 70 gektarga gilos koʻchatlari ekildi, 12 gektar yerda uzumzor barpo etildi.

Ispaniyadan keltirilgan “Magador”, “Maryblon 29c”, “Flopria” navli oʻrik koʻchatlari hosildor boʻlib, ikki oyligidayoq nishona koʻrsatdi. Bu bogʻ kelasi yildan toʻliq hosilga kiradi va gektariga 70 tonnagacha meva beradi. Bu har bir gektaridan 50 ming dollarlik meva eksport qilish mumkin degani.

Klaster egalari bu bilan cheklanib qolmasdan, bogʻ qator oralariga qovun, tarvuz ekdi. Ayni kunlarda gʻarq pishgan shirin-shakar tarvuz-qovunlar Rossiya va boshqa bozorlarga eksport qilinmoqda.

Qirq yillar mobaynida samarasiz yotgan yerlarda intensiv bogʻ yaratishga innovatsion asosda yondashilgan, suvni tejaydigan tomchilatib sugʻorish texnologiyasi joriy etilgan. Ushbu tizimni klasterning oʻzi yaratgan boʻlib, bu 50 foiz mablagʻni tejash imkonini bergan. Buning uchun 180 metr chuqurlikdan suv chiqariladigan 4 ta quduq qazilgan. Toʻliq kompyuterlashtirilgan tizim chanqagan yerlarga avtomatik tarzda suvni yuboradi. Yaʼni, hamma ish inson omilisiz, kompyuter orqali boshqariladi.

Bu - ikki bosqichli loyihaning dastlabkisi boʻlib, 2021-2022-yillarga moʻljallangan keyingi bosqichda yana 1 ming 455 gektar yer oʻzlashtiriladi.

Loyiha toʻliq amalga oshirilgach, 350 ta ish oʻrni yaratiladi, yiliga 10 million dollarlik meva-sabzavot mahsulotlari eksport qilinadi.

Ushbu foydalanilmay kelgan tashlandiq yerlarda obod bogʻ barpo etish oson boʻlgani yoʻq. Klaster buning uchun yerga tuproq soldi, unumdor texnologiyalar olib kelindi. Bu, albatta, yurtimizda foydalanilmay, qarovsiz yotgan yerlarni oʻzlashtirib, aholiga daromad keltiradigan maydonlarga aylantirish boʻyicha boshlangan saʼy-harakatlarning mevasi.

Davlatimiz rahbari bogʻni koʻzdan kechirdi, shu yerda nuroniylar, qishloq xoʻjalik xodimlari bilan suhbatlashdi.

Namangan viloyatida tumanlarni muayyan qishloq xoʻjalik ekinlariga ixtisoslashtirish, jumladan, Kosonsoy, Chortoq, Yangiqoʻrgʻon tumanlarini bogʻdorchilikka yoʻnaltirish lozimligi qayd etildi.

- Boshqa yoʻlimiz yoʻq. Yerimiz jannat, bundan foydalanib, Namanganni boshqa hududlarga namuna qilishimiz kerak, odamlarni uygʻotishimiz lozim. Yilma-yil foydalanish sharti bilan yerini, urugʻini, koʻchatini, mablagʻini beramiz, qolgan harakat odamlarning oʻzidan boʻlishi kerak. Shunday qilmasak ertaga natijamiz boʻlmaydi, - dedi Prezident.

Shu yerda Namangan viloyatida qishloq xoʻjaligi sohasini rivojlantirishga oid loyihalar, istiqbolli rejalar muhokama qilindi. Davlatimiz rahbari qishloq xoʻjaligiga bunday yangicha yondashuv Oʻzbekistonning yangi qirralarini, yangi imkoniyatlarini amalda namoyon etadigan tizim boʻlishi kerakligini taʼkidladi.

Mutasaddilarga tumanlarni aniq ekin turlariga ixtisoslashtirish boʻyicha qaror loyihasini tayyorlash, bunda har bir hududning iqlimi, imkoniyatlarini hisobga olish yuzasidan topshiriqlar berildi.

OʻzA

 

Oʻzbekiston Respublikasi Prezidenti Shavkat Mirziyoyevning Rossiya Federatsiyasi poytaxti Moskva shahriga tashrifi dasturining birinchi tadbiri oʻlaroq oliy darajadagi muzokaralar boʻldi.

Kremlda davlatimiz rahbarini Rossiya Prezidenti Vladimir Putin kutib oldi.

Suhbat chogʻida strategik sheriklik va koʻp qirrali hamkorlik munosabatlarini yana-da mustahkamlash masalalari koʻrib chiqildi.

Taʼkidlash joiz, Oʻzbekiston Prezidentining Rossiyaga davlat tashrifi bilan kelishi aynan shu kunlarga rejalashtirilgan edi. Ammo koronavirus pandemiyasi ushbu rejalarni oʻzgartirib yubordi, tadbir boshqa muddatga koʻchirildi.

Uchrashuv boshida Rossiya Prezidenti Shavkat Mirziyoyevga Buyuk Gʻalabaga bagʻishlangan tantanalarda ishtirok etish taklifini qabul qilgani uchun minnatdorlik bildirdi.

Vladimir Putin mamlakatimiz Qurolli Kuchlari vakillari mustaqil Oʻzbekiston tarixida ilk bor ertaga, 24-iyun kuni Qizil maydonda boʻlib oʻtadigan paradda ishtirok etishi haqida soʻz yuritar ekan, “bu oʻziga xos ittifoqchilik munosabatlarimizning yaqqol namoyishi” ekanini taʼkidladi.

Rossiya Prezidenti, shuningdek, Oʻzbekiston xalqi Gʻalabaga ulkan hissa qoʻshganini, yurtdoshlarimiz front ortida fidokorona mehnat qilganini, elimiz evakuatsiya qilinganlarni bagʻrikenglik bilan qabul qilganini mamnuniyat bilan qayd etdi. Toshkent shahrida Gʻalaba bogʻi tashkil etilgani alohida taʼkidlandi.

Davlatimiz rahbari, oʻz navbatida, Vladimir Putin va butun Rossiya xalqini ulugʻ ayyom bilan tabrikladi. «Bu – bizning umumiy tariximiz, umumiy gʻalabamiz”, - dedi Shavkat Mirziyoyev. Toshkentdagi Gʻalaba bogʻining Yodgorlik majmuasi fondini boyitish, shuningdek, Oʻzbekiston xalqining Gʻalabaga qoʻshgan hissasi toʻgʻrisida yana-da haqqoniy statistik maʼlumotlarni olish maqsadida arxiv materiallarini taqdim etishga tayyorlik namoyish etgani uchun Rossiya tomoniga minnatdorlik bildirildi.

Prezidentlar keyingi yillarda ikki tomonlama aloqalar jadal rivojlanib borayotganini katta mamnuniyat bilan qayd etdilar.

Jahon inqirozi oqibatlarining salbiy taʼsiriga qaramay, mamlakatlarimiz oʻrtasidagi tovar ayirboshlash hajmi izchil oʻsmoqda. Xususan, oʻtgan yili ushbu koʻrsatkich 6,6 milliard dollarga yetgan. Joriy yilning ilk oylarida oʻzaro savdo hajmi qariyb 2 milliard dollarni tashkil etdi.

Ikki davlat yetakchi kompaniyalarining kooperatsiyasi kengaymoqda: bugungi kunda 2 mingga yaqin qoʻshma korxona faoliyat yuritmoqda, yurtimiz iqtisodiyotining barcha asosiy tarmoqlarini qamrab olgan holda qiymati 12 milliard dollardan ziyod boʻlgan yangi investitsiya loyihalari amalga oshirilmoqda.

Umuman, Rossiyaning Oʻzbekiston iqtisodiyotiga kiritgan investitsiyalari hajmi 10 milliard dollardan oshdi.

Hamkorlikning yana bir ustuvor yoʻnalishi - fan va taʼlim sohalaridagi faol almashinuvlar. Keyingi bir necha yilda yurtimizda Rossiya yetakchi oliy taʼlim muassasalarining 7 ta filiali tashkil etildi. Ularning umumiy soni 10 taga yetdi. Rossiyaning yana 4 ta universiteti filiallarini ochish rejalashtirilgan.

Bunday oʻzaro manfaatli va samarali hamkorlikka koʻplab misollar keltirish mumkin.

Bu nafaqat savdo, investitsiyalar, transport va taʼlim, balki qishloq xoʻjaligi, fan va innovatsiyalar, sogʻliqni saqlash, madaniyat, turizm va boshqa muhim yoʻnalishlardir.

Davlat rahbarlari Oʻzbekiston-Rossiya munosabatlarining dolzarb masalalarini batafsil koʻrib chiqdilar.

Faol muloqotni davom ettirish hamda Hukumat rahbarlari darajasidagi Qoʻshma komissiya va Hukumatlararo komissiya faoliyati doirasida kelishuvlarni hayotga tatbiq etish muhimligi qayd etildi.

Ikki mamlakat hukumatlariga boʻlajak oliy darajadagi tashrifga puxta tayyorgarlikni davom ettirish, bunda yangi iqtisodiy dasturlar va ilgʻor investitsiya loyihalariga eʼtibor qaratish topshirildi.

Prezidentlar xalqaro va mintaqaviy masalalar yuzasidan ham fikr almashdilar, boʻlajak uchrashuvlar rejasini, shu jumladan MDH va SHHTning navbatdagi sammitlariga tayyorgarlik koʻrish va ularni oʻtkazish borasida anglashib oldilar.

Shu bilan Prezident Shavkat Mirziyoyev va Prezident Vladimir Putinning uchrashuvi yakuniga yetdi.

Ertaga davlatimiz rahbari fashizm ustidan qozonilgan Buyuk Gʻalabaning 75 yilligiga bagʻishlangan tantanali tadbirlarda ishtirok etishi rejalashtirilgan.

O'zA
 

Oʻzbekiston Respublikasi Prezidenti Shavkat Mirziyoyev 12-iyun kuni poytaxtimizning Olmazor tumanida amalga oshirilayotgan bunyodkorlik ishlari va yirik loyihalar bilan tanishdi.

Prezidentimiz dastlab Oʻzbekiston Fanlar akademiyasining Matematika institutiga tashrif buyurdi.

Davlatimiz rahbari Oliy Majlisga shu yil yanvar oyidagi Murojaatnomasida har yili ilm-fanning bir nechta ustuvor yoʻnalishi rivojlantirilishini aytgan edi. Joriy yilda matematika fani ana shulardan biri sifatida belgilandi.

Bu xalqimizni ham, ilmiy jamoatchilikni ham gʻoyat quvontirdi. Chunki matematika yurtimizda chuqur tarixiy asosga ega va bugungi kunda taraqqiyot uchun gʻoyat dolzarb.

Mamlakatimizda ushbu yoʻnalishni rivojlantirishda Fanlar akademiyasining Matematika instituti katta oʻrin tutadi. 1943-yilda tashkil etilgan bu dargoh oʻtgan davrda matematik tadqiqotlarning yirik markazlaridan biriga aylangan. Bu yerda shakllangan algebra va funksional analiz, differensial tenglamalar, ehtimollar nazariyasi va matematik statistika boʻyicha ilmiy maktablar jahon olimlari tomonidan eʼtirof etilgan.

2019-yilda mazkur fanni rivojlantirish boʻyicha muhim qadam tashlangan edi. 9-iyulda Oʻzbekiston Respublikasi Prezidentining “Matematika taʼlimi va fanlarini yana-da rivojlantirishni davlat tomonidan qoʻllab-quvvatlash, shuningdek, Oʻzbekiston Respublikasi Fanlar akademiyasining V.I.Romanovskiy nomidagi matematika instituti faoliyatini tubdan takomillashtirish chora-tadbirlari toʻgʻrisida”gi qarori qabul qilindi. Ushbu qaror asosida Matematika institutiga qator imtiyozlar berildi, jumladan, zamonaviy bino bilan taʼminlash belgilandi. Chunki institut shu paytgacha eski, taʼmirtalab binoda ish yuritib kelayotgan edi.

Matematiklarga zamonaviy sharoitlar yaratish maqsadida Olmazor tumanidagi Talabalar shaharchasida yangi bino qurilib, foydalanishga topshirildi.

Prezidentimiz bu yerda yaratilgan qulayliklar bilan tanishdi. Yangi imoratda 7 ta ilmiy laboratoriya va “Yosh matematiklar” markazi faoliyat yuritadi. Binoning shinam qavatlarida axborot-resurs markazi va seminar xonalari, akademik va tadqiqotchilar uchun kabinetlar, kutubxona, majlislar zali, oshxona joylashgan. Xonalar eng ilgʻor texnika va uskunalar bilan jihozlangan.

– Bu zamonaviy institut barcha olimlar uchun maʼrifat markazi boʻlishi kerak. Matematika koʻp fanlarga yoʻl ochadi. Uni Talabalar shaharchasida barpo etganimiz bejiz emas. Bu institut taʼlim va ilm-fan oʻrtasida uzviylikni taʼminlashi, mamlakatimiz rivojiga zamin yaratishi kerak, – dedi Shavkat Mirziyoyev.

2020-yil 7-mayda Oʻzbekiston Respublikasi Prezidentining “Matematika sohasidagi taʼlim sifatini oshirish va ilmiy-tadqiqotlarni rivojlantirish chora-tadbirlari toʻgʻrisida”gi qarori qabul qilindi. Unda matematika ilm-fani va taʼlimini yangi sifat bosqichiga olib chiqishga qaratilgan qator vazifalar belgilandi.

Shu yerda taʼlim sohasi mutasaddilari, rektor va olimlar bilan muloqot boʻldi.

– Matematika fanining tamal toshini Al-Xorazmiy, Ahmad Fargʻoniy, Abu Rayhon Beruniy kabi ulugʻ bobolarimiz qoʻygan. Bu bizning qonimizda bor. Lekin oxirgi yigirma yilda matematikadan bilim darajasi pasayib ketdi. Chunki oʻqituvchilarga kerakli eʼtibor, munosib oylik berolmadik, pirovard maqsad qoʻya olmadik. Buning oqibati hozir koʻpdan-koʻp sohalarda sezilyapti. Bugun bu fanni rivojlantirishdan maqsadimiz – matematika boʻyicha raqobat muhitini yaratish, sanoat, muhandislik yoʻnalishlarida yetuk kadrlar tayyorlash, – dedi Prezident.

Davlatimiz rahbari joriy yil 31-may kuni olimlar bilan uchrashuvda matematik ongni bogʻchadan boshlab shakllantirish zarurligini taʼkidlagan edi. Shundan kelib chiqib, Matematika institutida maktabgacha taʼlim, maktablar va oliy oʻquv yurtlaridagi darslarni muvofiqlashtiradigan tizim yoʻlga qoʻyilmoqda.

Shu boradagi taqdimot bilan tanishar ekan, Prezidentimiz “matematika oʻqituvchilarining bilim va malakasi boʻyicha har bir tuman kesimida tahlil bormi? Moddiy va tashkiliy jihatdan yana nimalar qilishimiz kerak?” deya savollar qoʻydi.

– Kechagi dars berish uslubi bilan matematikani jadal rivojlantirib boʻlmaydi. Shu bois avval amalda yaxshi natija bergan xorijiy metodika asosida taʼlim dasturlari yaratib, oʻqituvchilarni qayta tayyorlash zarur. Metodika shunday boʻlishi kerakki, u bolalarda matematikaga muhabbat uygʻotsin. Buning uchun oʻquvchilar bu fan hayotda, har bir sohada kerakligini anglashi zarur. Yoshlar imtihondan oʻtish uchun emas, bilimli mutaxassis boʻlish uchun oʻqishi lozim, – deb taʼkidladi Shavkat Mirziyoyev.

Oxirgi besh-oʻn yilda matematika yoʻnalishi boʻyicha universitetlarni bitirgan yoshlarni topib, xohishiga qarab qayta tayyorlab, maktablarga, fan nomzodlarini esa oliy taʼlim muassasalariga ishga jalb etish muhimligi taʼkidlandi. Matematika kafedra mudirlarini saylash tartibini joriy qilish, kafedra mudirlari kengashini tuzib, doimiy tajriba almashinuvni yoʻlga qoʻyish boʻyicha koʻrsatma berildi.

Matematika institutida 72 nafar ilmiy xodim, jumladan, 5 nafar akademik faoliyat yuritmoqda. Oxirgi ikki yilda 11 nafar fan doktori va 14 nafar fan nomzodi tayyorlangan. 422 ta ilmiy maqola (245 tasi chet elda), 9 ta monografiya (5 tasi chet elda) chop etilgan.

Sohadagi fundamental tadqiqotlarni moliyalashtirish hajmi bir yarim barobarga oshirildi. Xalqaro fan olimpiadalarida gʻolib boʻlgan yoshlar va ularning ustozlarini ragʻbatlantirish tizimi joriy etildi.

Muloqotda taʼlim sohasi mutasaddilari, olimlar, rektorlar Oʻzbekiston sharoitida matematika fanini oʻqitish boʻyicha platforma yaratilgani, endi taʼlim muassasalari oldida jamiyatda ushbu fanning obroʻsini yuksaltirish vazifasi turganini taʼkidladi.

Prezident Shavkat Mirziyoyev Olmazor tumani Talabalar shaharchasida barpo etilgan Innovatsion rivojlanish vazirligining yangi binosini borib koʻrdi.

Davlatimiz rahbarining 2017-yil 29-noyabrdagi farmoniga muvofiq Innovatsion rivojlanish vazirligi tashkil etilgan edi. Iqtisodiyotning barcha tarmoqlari va ijtimoiy sohalarni jahon ilm-fani yutuqlari, innovatsion gʻoyalar va texnologiyalar asosida jadal rivojlantirish ushbu vazirlikning vazifalari etib belgilangandi.

Oʻsha yili vazirlik uchun Talabalar shaharchasidan joy tanlanib, ilgʻor ilm-fan yutuqlarini mujassam etgan, olimlar, tadqiqotchilar ishlashi uchun zamonaviy muhitga ega bino qurishga kirishilgandi.

Davlatimiz rahbari 2017-yil 2-dekabr va oʻtgan yil 24-mayda bunyodkorlik ishlarining borishi bilan joyning oʻzida tanishib, ushbu vazirlik olimlarning ilmiy salohiyati birlashadigan, innovatsion gʻoyalar startaplarga aylanib, iqtisodiyot tarmoqlariga joriy etiladigan markaz boʻlishi zarurligini taʼkidlagan edi.

Shu asosda har tomonlama puxta loyiha ishlab chiqildi. Natijada bu yerda poytaxtimizdagi meʼmoriy jihatdan koʻrkam binolardan biri qad rostladi.

5 qavatli binoda innovatsion muhit yaratilgan. Birinchi qavatda koʻrgazmalar zali, amfiteatr, yosh ixtirochilar xonasi, axborot boʻlimi, elektron kutubxona, qahvaxona, bolalar xonasi, fuqarolar qabulxonasi joylashgan. Ikkinchi qavatda Innovatsion ishlanmalarni joriy etish ilmiy-amaliy markazi, robototexnika va mexatronika, internet dasturlari boʻyicha zamonaviy laboratoriyalar tashkil etilgan. Ilmiy-texnik axborot markazi, Oʻzbekiston Milliy universiteti huzuridagi Intellektual dasturiy tizimlar ilmiy-amaliy markazi, startap xonalari uchinchi qavatda joylashgan. Yuqori qavatlardan vazirlik xodimlari uchun kabinetlar, anjumanlar zallari oʻrin olgan. Bu yerda aerokosmik tadqiqotlar va 3D prototiplashtirish boʻyicha oʻquv laboratoriyalar ham faoliyat koʻrsatadi.

Bino atrofidagi innovatsion bogʻda favvora, yozgi amfiteatr, taqdimot maydonchalari barpo etilgan.

Prezidentimiz dastlab interfaol koʻrgazma zali – “Showroom” bilan tanishdi. Ushbu koʻrgazma yetakchi xorijiy va mahalliy kompaniyalarda ishlab chiqarilayotgan innovatsion mahsulotlar, startap loyihalar toʻgʻrisida maʼlumot beradi. U turli sohalardagi 37 ta loyihani qamrab oluvchi 8 ta blokdan iborat.

Bu yerda robototexnika, texnologiyalar transferiga tegishli va Yoshlar akademiyasi aʼzolari loyihalari, qishloq xoʻjaligi, sogʻliqni saqlash, davlat boshqaruvidagi innovatsiyalar namoyish etiladi, “aqlli” bank faoliyat koʻrsatadi.

Masalan, robototexnika burchagida yetakchi xorijiy kompaniyalarning robotlari joylashtirilgan. Bu yerga keluvchilar robotlarni yasashi yoki boshqarib koʻrishi mumkin. Sohani chuqurroq oʻrganish istagida boʻlganlar oʻrganishlarini ikkinchi qavatdagi robototexnika oʻquv-tadqiqot laboratoriyasida davom ettiradi.

Iqtisodiyot tarmoqlari va ijtimoiy sohaga oid texnologiyalar transferi boʻlimida yuqori texnologiyalar, “nou-xaular”, “aqlli” qurilmalar, kundalik hayotda qoʻllanadigan innovatsion jihozlar bilan tanishish mumkin.

Isroilning “Maya International” kompaniyasi bilan hamkorlikda sunʼiy yoʻldosh orqali quvurlardan suv sizishini aniqlaydigan texnologiya Toshkent shahriga transfer qilindi. Ushbu loyihada sunʼiy yoʻldosh orqali quvurlardan suv va gaz sizish nuqtalarini aniqlash mumkin.

Maʼlumotlarga koʻra, poytaxtimizning magistral quvurlaridagi nosozliklar tufayli yiliga 215 million kub metr suv isrof boʻlar ekan. Buni pulga chaqsa, 5 million dollardan ortiq mablagʻ deganidir. Mazkur texnologiya bunday isrofgarchiliklarning oldini olishda muhim ahamiyatga ega.

Qurilish va avtosanoat sohalariga tegishli yana bir loyiha – import oʻrnini bosuvchi, eksportga yoʻnaltiriladigan poliefir shpatlyovka va poliefir yelim ishlab chiqarish texnologiyasi transferi Innovatsion rivojlanish vazirligi va Polshaning “Novol Asia” qoʻshma korxonasi tomonidan muvaffaqiyatli amalga oshirildi. Oʻzida toʻldiruvchi va bezak beruvchi xususiyatlarni mujassam etgan ushbu shpatlyovka avtomobil sanoati va mebelsozlikda qoʻllanilishi mumkin.

Malayziyaning “Cy Rewards” kompaniyasi bilan hamkorlikda joriy etilayotgan arzon uylar qurish texnologiyasi ham taqdim etildi. Bu texnologiyaning afzalligi 2-3 qavatli uylarni qisqa vaqtda qurish imkonini beradi. Bunda bir kvadrat metr uyning tannaxri uch yuz dollar boʻladi.

Vazirlik binosidagi interaktiv studiyada onlayn darslar, vebinarlar oʻtkazish, videodarslar yozish mumkin. Bu studiya “Bir million dasturchi” loyihasi doirasida yoshlarni oʻqitish, masofaviy muloqot orqali joylardagi mutaxassislar malakasini oshirishda ham qoʻl keladi.

– Mamlakatimiz yuqori texnologik sohalar boʻyicha dunyodan ortda qolib ketgan. Barcha sohalarni modernizatsiya qilish, jahon bilan hamqadam boʻlish uchun Innovatsion rivojlanish vazirligini tashkil etib, shunday sharoitlar yaratdik. Vazirlik jamoasi yil yakuni boʻyicha bu borada aniq amaliy natijalarni koʻrsatishi kerak, – deya taʼkidladi Shavkat Mirziyoyev.

Prezidentimiz videoaloqa tizimi orqali vazirlikning Ilgʻor texnologiyalar markazi mutaxassislari bilan muloqot qildi.

Davlatimiz tomonidan odamlarni ilm-fanga qiziqtirish va ragʻbatlantirishga katta eʼtibor qaratilmoqda. Vazirlikning yangi zamonaviy binosida buning uchun barcha sharoit muhayyo. Iqtidorli yoshlar bu yerda eng soʻnggi ishlanma va texnologiyalar bilan tanishish barobarida startap loyihalarda ishtirok etish imkoniyatiga ega boʻladi.

Binoda kengaytirilgan virtual reallik texnologiyasi – NazzAR platformasi ishga tushirilgan. Bu texnologiya foydalanuvchilarga qoʻlidagi smartfoni orqali dunyo obyektlari bilan interfaol munosabatlarga kirishish imkonini beradi.

Prezidentimiz tibbiyotdagi innovatsiyalar, Yoshlar akademiyasi aʼzolarining loyihalari, gʻoʻzaning vilt kasalligiga chidamli yangi navlarini yaratish, gen-nokaut texnologiyasi yordamida kartoshka va bugʻdoy hosildorligini oshirish, Koreya texnologiyasi asosida qishda qovun yetishtirishga moʻljallangan issiqxona loyihalari bilan tanishdi. Vazirlik axborot xizmati, kutubxona, anjumanlar zalini koʻzdan kechirdi.

Bugungi kunda Innovatsion rivojlanish vazirligi tomonidan ilm-fan va ishlab chiqarish oʻrtasidagi integratsiyani taʼminlash uchun zarur tizim yaratildi. Ilmiy-tadqiqot muassasalari va olimlarning innovatsion gʻoya va loyihalari qoʻllab-quvvatlanib, qiymati 28,2 milliard soʻmlik 31 ta startap loyiha moliyalashtirildi. Xalqaro hamkorlik doirasida hozirgi kunda Germaniya, Rossiya va Belarusdagi sheriklar bilan 9,6 milliard soʻmlik 38 ta qoʻshma loyiha amalga oshirilmoqda.

Vazirlikka berilgan vakolat va yaratilgan sharoitlardan samarali foydalanish, ishlanmalarni soha va tarmoqlarga tatbiq etish boʻyicha topshiriqlar berildi.

Fayzli xonadon – chinakam baxt oshiyoni. Muqim ish joyi esa doimiy daromad kafolatidir. Odamlarimizning oʻz hayotidan rozi boʻlib yashashida har ikki omilning oʻrni muhim. Shu bois, mamlakatimizda yuritilayotgan kuchli ijtimoiy siyosat orqali aholining ayni shu ehtiyojini taʼminlashga alohida eʼtibor qaratilyapti.

Bundan bir yil oldin, 2019-yil 24-may kuni Prezident Shavkat Mirziyoyev Oʻzbekiston Milliy universitetida oliy taʼlim va ilm-fan namoyandalari bilan uchrashgan edi. Olim va pedagoglarning ijtimoiy sharoitlarini yaxshilash masalalariga alohida eʼtibor qaratib, ular uchun koʻp qavatli uylar qurish boʻyicha koʻrsatmalar bergandi.

Shunga muvofiq, Toshkentdagi Talabalar shaharchasi hududida 6 ta 9 qavatli 216 xonadonga moʻljallangan uy bunyod etildi.

Qayd etish lozimki, ushbu koʻp qavatli uylarni qurishda eng zamonaviy qurilish materiallaridan foydalanilgan. Innovatsion texnologiyalar asosida binolarning tashqi devorlari energiya tejamkor materiallar bilan qoplangan. Bu uylar qishda issiq, yozda salqin boʻlishini taʼminlaydi.

Bundan tashqari, har bir xonadon alohida isitish moslamalari bilan jihozlangan, videokuzatuv tizimiga ega. Xonadonlar taʼmirlangan, gaz plitasi, santexnika buyumlari oʻrnatilgan holda egalariga topshirildi.

Davlatimiz rahbari Olmazor tumaniga tashrifi doirasida mazkur uylarda yaratilgan sharoitlarni koʻzdan kechirdi, xonadon egalari bilan suhbatlashdi.

– Sizlarni, sizlar orqali bu yerda yashaydigan barcha oilalarni tabriklayman, mana shu shinam, zamonaviy uylar muborak boʻlsin! Oʻzim ham qishloqdan kelib, 15 yil ijarada yashagan odam sifatida bu narsaning qadrini juda yaxshi his qilaman. Biz olim va pedagoglardan natija kutardigu, sharoitini soʻramasdik. Sizlarni ham rozi qiladigan vaqt-soat keldi. Ilmli odamlar – mamlakatimizning oltin fondi. Ularning qoʻlida kelajagimiz boʻlgan bolalarimiz tarbiyalanadi. Oʻqituvchilar uyli boʻlib, oilasidan koʻngli toʻq boʻlsa, kasbiga mehr bilan, Vatanga sadoqat bilan ishlaydi. Bu uylar sizlarga buyursin, shu yerda toʻylar qilinglar. Farzandlaringiz, nevaralaringiz ota-onam ilmni tanlab kam boʻlmadi, deb yursin, – deya ezgu niyatlar bildirdi Prezident.

Keyingi yillarda mamlakatimizda sogʻliqni saqlash sohasida xususiy sektorni rivojlantirishga qaratilgan islohotlar natijasida joylarda zamonaviy tibbiy muassasalar ishga tushirilmoqda.

Olmazor tumanidagi “Nano Medical Clinic” koʻp tarmoqli tibbiyot klinikasi ana shunday subyektlardan biri.

Oʻtgan yili dekabrda ishga tushirilgan terapevtik binoda maslahat poliklinikasi, 35 oʻrinli statsionar, yadro tibbiyoti, gemodializ va terapiya boʻlimlari, laboratoriya joylashgan. Ushbu kompleks chet el loyihasi asosida barpo etilgan.

Davlatimiz rahbari bu qurilish loyihasiga alohida eʼtibor qaratdi. Har bir metr yerdan oqilona foydalanib, hamma jihatlar hisobga olingani, boshqa obyektlarni loyihalashtirishda buni oʻrganish kerakligini taʼkidladi.

Klinikada endokrinologiya, nevrologiya, kardiologiya, oftalmologiya, urologiya, otorinolaringologiya, ultratovush tashxisi, terapiya, fizioterapiya boʻyicha konservativ davolash yoʻlga qoʻyilgan. Shifo maskani raqamli rentgen, kompyuter tomografiyasi, suyak densitometri, yurak defibrillyatori kabi ilgʻor diagnostika uskunalari bilan jihozlangan. Bu yerda 15 nafar oliy toifali shifokor faoliyat olib bormoqda.

Muhim jihati, klinikada radionuklid tekshiruviga asoslangan yadro tibbiyoti va intervension radiologiya joriy qilingan. Bu turli endokrin va onkologik kasalliklarni aniqlash va davolashda katta samara beradi. Ushbu yoʻnalishlar Atom energetikasi boʻyicha xalqaro agentlik (MAGATE) nazoratida tashkil etilgan. Bundan tashqari, Germaniya, Turkiya, Rossiyadagi yetakchi tibbiy markazlar bilan hamkorlik yoʻlga qoʻyilgan.

Gemodializ boʻlimi surunkali buyrak yetishmovchiligiga olib kelishi mumkin boʻlgan va boshqa ichki aʼzolarning aniq diagnostikasi hamda davolash ishlarini bajaradi. Boʻlimda gemodializ, gemodiafiltratsiya va plazmaferez kabi operatsiyalar amalga oshirilmoqda.

Klinika mutaxassislari tomonidan suyak toʻqimasining mineral zichligini aniqlashning diagnostik usuli (Ultratovush suyak densitometri) ham muvaffaqiyatli bajarilmoqda. Bu tekshiruv orqali suyak tizimi toʻliq oʻrganilib, osteoporoz xavfi bor yoki yoʻqligi aniqlab olinadi.

Densitometriya taqdim etgan maʼlumotlar juda qimmatli boʻlib, shifokor suyak toʻqimalarining miqdoriy zichligini raqamli hisob-kitob orqali batafsil oʻrganadi.

Bugungi kunda loyihaning ikkinchi bosqichi doirasida uch qavatli jarrohlik binosi qurilmoqda. Bu aholiga jahon standartlari darajasida tibbiy xizmat koʻrsatish va yana 60 ta yangi ish oʻrni tashkil etish imkonini beradi.

Shu yerda davlatimiz rahbariga xususiy tibbiyot tizimida amalga oshirilayotgan ishlar, sogʻliqni saqlash sohasiga axborot texnologiyalarini joriy etish va ulardan samarali foydalanish borasidagi rejalar haqida ham maʼlumot berildi.

Oʻzbekiston Respublikasi Prezidentining 2017-yil 1-apreldagi “Sogʻliqni saqlash sohasida xususiy sektorni yana-da rivojlantirish chora-tadbirlari toʻgʻrisida”gi hamda oʻsha yil 29-dekabrdagi “Xususiy tibbiyot tashkilotlarini yana-da rivojlantirish boʻyicha qoʻshimcha shart-sharoitlarni yaratish toʻgʻrisida”gi qarorlari bu boradagi imkoniyatlarni kengaytirdi.

Misol uchun, xususiy klinikalar shugʻullanishi mumkin boʻlgan ixtisosliklar 50 tadan 129 taga koʻpaytirildi. 2022-yil 1-yanvargacha soliq va bojxona toʻlovlari boʻyicha imtiyozlar berildi.

Natijada 2017-yilda xususiy tibbiyot muassasalari 3 ming 454 tani tashkil qilgan boʻlsa, joriy yil 1-iyun holatiga koʻra, 5 ming 612 taga yetgan. 11 mingdan ortiq ish oʻrni yaratilgan.

Hududlarda zamonaviy klinikalar tashkil etib, tibbiy xizmatlar boʻyicha raqobatni, pirovardida sifatni taʼminlash, aholi salomatligini mustahkamlash yuzasidan koʻrsatmalar berildi.

Davlatimiz rahbari, shuningdek, Olmazor tumanidagi “ARDENT FOODS” masʼuliyati cheklangan jamiyat korxonasida boʻldi.

Bu shirkat boʻsh turgan binolar negizida yangi subyektlar tashkil etish va ish oʻrinlari yaratishga qaratilgan siyosat samarasi.

Loyiha qiymati 77 milliard soʻmdan ziyod boʻlgan korxona ikkita liniyadan iborat. Birida yigirmaga yaqin turdagi qandolat mahsulotlari, ikkinchisida tez pishadigan ovqat ingrediyentlari ishlab chiqarilmoqda. 150 kishi ish bilan taʼminlangan.

Hozirgi kunda mahsulotlar Tojikiston va Afgʻonistonga eksport qilinadi. Yangi eksport bozorlarini ochib, joriy yil yakunida eksport hajmini 45 ming dollarga yetkazish rejalashtirilgan.

Mahsulotlar turini koʻpaytirib, qoʻshimcha ish oʻrinlari yaratish boʻyicha koʻrsatmalar berildi.

Prezident Olmazor tumanidagi “Next Generation Product” qoʻshma korxonasi faoliyati bilan ham tanishdi.

Bu yerda “Royal” savdo belgisi ostida yiliga 460 ming dona elektr va quyosh energiyasi asosida ishlovchi suv isitish uskunasi, Germaniyaning “Viessmann” brendi ostida 75 ming dona suv isitish qozoni ishlab chiqariladi. Korxonada jami 530 kishi ish oʻrni bilan taʼminlangan.

Mahsulotlar Rossiya, Ukraina, Qozogʻiston, Qirgʻiziston, Tojikiston, Turkmaniston va Afgʻonistonga eksport qilinmoqda.

Pandemiya sharoitiga qaramay korxonada ishlab chiqarish surʼati pasaygani yoʻq. Yanvar-may oylarida 1,8 million dollarlik eksport amalga oshirildi. Yil yakunigacha koʻrsatkichni 7 million dollarga yetkazish moʻljallangan.

Davlatimiz rahbariga shu yerda istiqboldagi loyihalar haqida ham maʼlumot berildi. Prezidentimiz mahsulotlar turini koʻpaytirib, qoʻshimcha ish oʻrinlari yaratish boʻyicha koʻrsatmalar berdi.

Prezident Shavkat Mirziyoyev mutasaddi rahbarlar ishtirokida Olmazor tumani faollari, nuroniylar bilan uchrashuv oʻtkazdi.

– Oxirgi uch yilda Olmazorga toʻrtinchi marta kelyapmiz. Tumanda oʻzgarish boʻlyaptimi, odamlar manfaat koʻryaptimi, nima muammolar bor, degan savollar meni qiynaydi. Bugun natijalarni tahlil qilib, sizlar bilan bamaslahat yangi yoʻnalishlar va rejalarni belgilab olishimiz kerak, – dedi davlatimiz rahbari.

Tumanda kambagʻallikni qisqartirish, investitsiya loyihalarini amalga oshirib, yangi ish oʻrinlari tashkil etish, aholining turmush sharoitlarini yaxshilash masalalari muhokama qilindi.

Uyma-uy yurish orqali Olmazorda 3 ming 23 ta yordamga muhtoj oila borligi aniqlangan. Shundan 568 oila aʼzosi ishga joylashtirilib, yordamga muhtojlar toifasidan chiqarildi. Bosh vazir oʻrinbosari qolgan 2 ming 455 oilani yil oxirigacha kambagʻallikdan olib chiqish boʻyicha hisobot berdi.

Joriy yilda qiymati 3 trillion soʻm boʻlgan 48 ta investitsiya loyihasi ishga tushirilishi rejalashtirilgan. Bosh vazir oʻrinbosari toʻliq ishlatilmayotgan 12 ta davlat obyekti va ilgari xususiylashtirilib, hozir boʻsh turgan 97 ta bino va yer maydonlari negizida yangi korxonalarni tashkil etish boʻyicha loyiha takliflarini taqdimot qildi.

Davlatimiz rahbari yangi loyihalar uchun imkoniyatlarni kengaytirish maqsadida Toshkent tumanining Olmazorga yaqin hududidan 200 gektar yer ajratib, yangi sanoat zonasi barpo etishni taklif qildi. U yerda tashkil etiladigan korxonalarda kamida 60 mingta yangi ish oʻrni yaratish mumkin boʻladi.

“Chorsu bozori”, Zarqaynar, Sagʻbon, Sebzor, Qorasaroy, Goʻzalbogʻ va boshqa koʻcha-mahallalarda, jami 482 gektar maydonda zamonaviy turistik, savdo va dam olish maskani – “ochiq osmon ostidagi muzey” barpo etiladi. Bu yerda hunarmandchilik doʻkonlari va rastalari, choyxona va mehmonxonalar, kichik muzeylar tashkil etiladi.

“Agregat” zavodini Chirchiqqa koʻchirgan holda, uning hududida Olmazor aholisi uchun 12-14-16 qavatli arzon uylar qurish, Toshkent tumanida Olmazorga yaqin hududda 260 gektar yerda 150 ming aholiga moʻljallangan yoʻldosh shaharcha barpo etish boʻyicha topshiriqlar berildi.

Jamoatchilik vakillari tumanda amalga oshirilayotgan ishlar boʻyicha fikr va takliflarini bildirdi.

 OʻzA

Oʻzbekiston Respublikasi Prezidenti Shavkat Mirziyoyev huzurida 8-iyun kuni axborot texnologiyalari va raqamli iqtisodiyotni rivojlantirish borasidagi islohotlar ijrosi boʻyicha taqdimot oʻtkazildi.

Shu yil 28-aprelda davlatimiz rahbarining “Raqamli iqtisodiyot va elektron hukumatni keng joriy etish chora-tadbirlari toʻgʻrisida”gi qarori qabul qilingan edi. Qarorda belgilangan vazifalarni sifatli amalga oshirish va koordinatsiya qilish uchun Bosh vazir maslahatchisi lavozimi joriy etildi.

Bugungi tadbirda sohadagi maqsadlarga zamonaviy dasturchilar tayyorlashni jadallashtirish orqali erishish mumkinligi qayd etildi.

“Bir million dasturchi” loyihasining dastlabki bosqichida 62 mingdan ziyod oʻquvchi qamrab olinib, ularning 5 ming 400 nafariga malaka sertifikati berildi.

Joriy yil yakuniga qadar 100 mingta va 2021-yilning birinchi yarmida yana 150 mingta oʻquvchini oʻqitish, talabalarning dasturiy taʼminot boʻyicha malakasini oshirish vazifasi belgilandi. 5-sinfdan oʻqitib kelinayotgan “Informatika” fanini zamonaviy texnologiyalardan kelib chiqib takomillashtirish, ushbu fanga “Bir million dasturchi” loyihasiga doir yoʻnalishlarni kiritish boʻyicha koʻrsatmalar berildi.

Bugungi kunda raqamli iqtisodiyot, “Elektron hukumat” xizmatlariga talab kundan-kunga oshib bormoqda. Lekin hozirda 780 tur davlat xizmatidan bor-yoʻgʻi 185 tasidan “elektron portal” orqali foydalanish imkoni mavjud. Aksariyat tashkilotlarda ish jarayonini raqamlashtirish faqat hujjat almashinuvini elektronlashtirish bilan cheklanib qolmoqda.

Shu bois “Elektron oʻqitish dasturi” orqali oʻqib, diplom olgan dasturchilarni davlat va xoʻjalik muassasalariga IT mutaxassis sifatida ishga olish zarurligi taʼkidlandi. Ular tashkilotlarning barcha faoliyatini anʼanaviy elektron formatdan raqamli koʻrinishga oʻtkazishga masʼul boʻladi.

Misol uchun, bugungi kunda kambagʻal oilalarga kredit va subsidiyalar berish masalasini maxsus elektron dastur aniq mezonlar asosida avtomatik ravishda belgilashi kerak.

Bosh vazir maslahatchisiga xalqaro ekspertlarni jalb qilgan holda, tashkilotlarda ruxsat berish va qaror qabul qilish jarayonlarini elektron formatga oʻtkazish boʻyicha konsepsiya ishlab chiqish topshirildi.

IT infratuzilmasini yaxshilash, aholi, ayniqsa, yoshlarning bu boradagi savodxonligini oshirish davr talabidir.

Axborot texnologiyalari va kommunikatsiyalarini rivojlantirish vazirligiga barcha hududlarda raqamli texnologiyalar boʻyicha kamida 100 ta oʻquv markazi ochish vazifasi qoʻyildi. Bu dargohlarda dasturlash asoslari, elektron savdo va grafikli dizayn kabi yoʻnalishlar boʻyicha qisqa muddatli oʻquv kurslari tashkil etiladi.

Soha mutaxassislariga sharoit yaratish masalalariga ham eʼtibor qaratilmoqda. Oʻtgan yili Toshkent shahrining Mirzo Ulugʻbek tumanida Dasturiy mahsulotlar va axborot texnologiyalari parki bunyod etilgan edi. Andijon va Margʻilon shaharlarida mazkur IT parkning filiallari tashkil qilindi. Poytaxtimizda Muhammad al-Xorazmiy nomidagi axborot texnologiyalari maktabi hududida yana bir filial binosi qurilmoqda.

Joriy yil yakuniga qadar Guliston, Buxoro, Namangan, Nukus, Samarqand, Urganch va Jizzax shaharlarida shunday filiallar tashkil etish rejalashtirilgan.

Taqdimotda mutasaddilar mazkur IT parklar qurilishi, optik tolali liniyalar qamrovi, mobil internet tezligi va sifatini oshirish ishlari yuzasidan axborot berdi.

O'zA

Oʻzbekiston Respublikasi Prezidenti Shavkat Mirziyoyev aholi hayoti, ijtimoiy-iqtisodiy islohotlarning borishi, yirik loyihalar bilan tanishish maqsadida 5-6-iyun kunlari Fargʻona viloyatida boʻldi.  

Tashrifning ikkinchi kuni Fargʻona shahrida viloyat va tuman hokimlari, soha va tarmoqlar rahbarlari, jamoatchilik vakillari bilan yigʻilish boʻlib oʻtdi.

Davlatimiz rahbari xalq bilan ochiqcha gaplashib, muammolarni birgalikda hal etish, odamlarning ogʻirini yengil qilish maqsadida kelganini taʼkidladi.

– Men qisqa, sizlar koʻproq gapirsalaringiz toʻgʻri boʻladi. Maqtov kerak emas. Prezidentga eng katta maqtov – bu xalq ishonchi. Hali endi birinchi qadamlarni qoʻyayapmiz. Kelib, qarsak eshitib ketish mengayam oson. Lekin bundan natija boʻlmaydi. Tumanlarga oʻzim borishimning sababi – odamlarning yashash sharoitlarini yuragimdan oʻtkazib, aniq choralar koʻrish, islohotlar uzoq-uzoq joylarda ham natija beryaptimi, quyi tizimdagi rahbarlar sadoqat bilan, jon kuydirib ishlayaptimi, degan savollarga javob topish. Har kuni bunday uchrashuv boʻlmaydi. Achchiq-achchiq masalalarni qatʼiy qoʻyinglar, – dedi Prezident.

Davlatimiz rahbari oʻtgan hafta Soʻx tumanida boʻlgan voqealarga ham toʻxtalib, munosabat bildirdi.

– Keyingi yillarda qoʻshni davlatlar bilan chegaradosh joylardagi koʻp muammolarni hal qilishga erishdik. Soʻxdagi voqealar qirgʻiz xalqi bilan doʻstligimizga, bordi-keldimizga, rejalarimizga taʼsir qilmasligi kerak. Vazmin, sabr-toqatli, mehr-oqibatli boʻlishimiz zarur. Qoʻshnichilik – ming yilchilik. Xalqlarimiz yelkadosh boʻlib, bir-birini hurmat qilib yashashi kerak, – dedi Shavkat Mirziyoyev.

Bosh vazir rahbarligida Hukumat komissiyasi tomonidan muammolar oʻrganilib, keng qamrovli takliflar tayyorlangan. 2020-2022-yillarda Soʻx tumanini kompleks rivojlantirishga 500 milliard soʻm mablagʻ yoʻnaltirish belgilangan. 11 ming yangi ish joyi tashkil etish rejalashtirilgan.

98 loyiha amalga oshirilib, sanoat, qishloq xoʻjaligi va xizmat koʻrsatish sohalari rivojlantiriladi. Jismoniy shaxslar yer va mol-mulk soligʻidan ozod etilib, yakka tartibdagi tadbirkorlar uchun daromad soligʻi stavkasi 2 barobar kamaytiriladi. 1 ming gektar ekin yerlarida suv taʼminoti yaxshilanadi.

Tuman tibbiyot birlashmasi boʻlimlari, yuqumli kasalliklar shifoxonasi, markaziy shifoxona tibbiy asbob-uskunalar va maxsus reanimobil bilan taʼminlanadi. Maktablar, qishloq vrachlik punktlari, yoʻllar va ijtimoiy obyektlar taʼmirlanadi.

Soʻxlik yoshlar uchun vodiy viloyatlaridagi oliy taʼlim muassasalarida 2020/2021 oʻquv yilida davlat granti asosida maqsadli ravishda qoʻshimcha 500 ta oʻrin ajratiladi.

Mamlakatimizda kambagʻallikni qisqartirish, odamlarni ish bilan taʼminlash, daromadini oshirish boʻyicha katta ishlar amalga oshirilmoqda. Yigʻilishda bu borada Fargʻonada ham keng koʻlamli saʼy-harakatlar boshlangani, viloyatdagi 43 mingdan ziyod oilani yil yakuniga qadar kambagʻallikdan chiqarish maqsad qilingani qayd etildi.

Xususan, kichik biznes, oilaviy tadbirkorlik va oʻzini oʻzi band qilish orqali qariyb 14 ming oilaning oyoqqa turishiga koʻmaklashiladi. Bunday loyihalarni moliyalashtirish uchun kredit resurslari hajmini 25 foizga oshirish, oilaviy tadbirkorlik dasturlari doirasida 400 milliard soʻm kredit ajratish boʻyicha koʻrsatma berildi.

Investitsiya loyihalarini amalga oshirish va erkin iqtisodiy zonalar orqali 6 mingdan, qishloq xoʻjaligi sohasida 17 mingdan ortiq oilani kambagʻallikdan chiqarish choralari koʻriladi.

Masalan, gʻalladan qisqargan 4 ming gektar, foydalanishdan chiqqan 3,5 ming gektar yerda bogʻ va tokzorlar tashkil etiladi. Oʻrmon xoʻjaligi davlat qoʻmitasi huzurida Dorivor oʻsimliklar ilmiy markazi tashkil etilib, 10 ming gektarda dorivor oʻsimliklar yetishtirish yoʻlga qoʻyiladi.

Irrigatsiya tizimidagi yoʻqotishlarni kamaytirish va zamonaviy texnologiyalarni joriy etish, buning uchun Tiklanish va taraqqiyot jamgʻarmasidan 50 million dollar ajratish toʻgʻrisidagi qaror ham Fargʻona viloyati uchun katta ahamiyatga ega.

Yigʻilishda Prezidentimiz Fargʻona viloyatida “Tadbirkor –islohotchi” tashabbusini amalga oshirish kerakligini taʼkidladi.

Bugungi tahlillar, global iqtisodiy inqiroz butun dunyoga xavf solib turgan ayni paytda, mamlakatimizda bundan uch yil avval tadbirkorlikka keng erkinlik berish boʻyicha qoʻyilgan qadamlar toʻgʻri boʻlganini koʻrsatdi. Yurtimizda tadbirkorlik rivojlanmaganda, faqat davlat tashkilotlari ishlab turganda hozir ahvol nima kechardi?

“Tadbirkor – islohotchi” tashabbusi asosida soha vakillariga imkoniyatlar berilib, masʼuliyati oshiriladi. Bosh vazir oʻrinbosari, Savdo-sanoat palatasi raisi, Biznes-ombudsman, Fargʻona viloyati hokimi bir oyda ikki marta onlayn tizim orqali tadbirkorlar bilan yakkama-yakka muloqot oʻtkazib, ular faoliyatiga toʻsiq boʻlayotgan muammolarni hal qiladi. Chunki qancha imtiyoz berilmasin, sharoit yaratilmasin, pul aylanmasi, kredit olish, eksport qilish, muhandislik tarmoqlariga ulanish kabi yoʻnalishlarda baribir muammolar uchrayapti.

– Bunga kim aybdor? Mahalliy hokimiyatmi, soliqchimi, prokurormi? Yoki qonunlarimiz ishlamaydimi? Mana shu masalalarni oʻrganib, yil yakuni boʻyicha “Fargʻona tadbirkorlari – islohotchi” tajribasi davomida erishilgan natijalarni boshqa viloyatlarga ham tatbiq etamiz, – dedi Prezident.

Davlatimiz rahbari Biznes-ombudsman uch oy Fargʻona viloyatida yurib, har bir korxona, har bir tadbirkor bilan dillashib, tillashib, soha vakillariga qonuniy kafolatlarni kuchaytirish boʻyicha tavsiyalar berishi lozimligini taʼkidladi. Uy-joylar qurish, ichimlik suvi taʼminoti va oqova tarmoqlarini yaxshilash boʻyicha ham vazifalar belgilandi.

Fargʻona tajribasi asosida “loyihalar fabrikasi”ni keng rivojlantirish, IT markazlarda oʻquv kurslari tashkil etib, yiliga 262 mingdan ziyod yoshni oʻqitish muhimligi taʼkidlandi.

Yigʻilishda Bosh vazir oʻrinbosarlari, vazirlar, iqtisodiyot tarmoqlari mutasaddilari, hokimlarning hisoboti eshitildi.

Faoliyatida sustkashlikka yoʻl qoʻygan Toshloq tumani hokimi va soliq inspeksiyasi boshligʻini vazifasidan ozod etish boʻyicha koʻrsatma berildi.

Davlatimiz rahbari Fargʻona shahridagi Oʻzbekiston – Koreya xalqaro universitetida boʻldi.

Mazkur taʼlim muassasasi Oʻzbekiston Respublikasi Vazirlar Mahkamasining 2019-yil 23-avgustdagi qaroriga muvofiq tashkil etilgan. Bu yerda taʼlim toʻlov-kontrakt asosida, ilgʻor oʻquv rejalari va dasturlari boʻyicha oʻzbek, koreys, ingliz tillarida olib boriladi.

Universitet 4000 talabani qabul qilish imkoniyatiga ega. Tugayotgan oʻquv yilida birinchi kursda 720 yigit-qiz taʼlim oldi. Janubiy Koreya Respublikasidan 11 tajribali pedagog jalb qilingan boʻlib, kelgusida 43 nafarga yetadi.

Joriy yilda mazkur xalqaro taʼlim dargohi uchun yangi bino qurildi.

Shavkat Mirziyoyev universitet rektori Pak Jun Xu va koreyalik oʻqituvchilar bilan suhbatlashdi. Oʻquv dasturi va mazmuni, yoshlarning fanlarni oʻzlashtirishi bilan qiziqdi.

Muassasada gumanitar hamda texnik-muhandislik yoʻnalishlarida taʼlim beriladi. Xususan, turizm menejmenti, maktabgacha taʼlim, menejment va kompyuterlashtirilgan buxgalteriya hisobi, koreys tili va adabiyoti fanlari oʻqitiladi. Shuningdek, mashinasozlik muhandisligi, kelajak avtomobilsozligi injiniringi, elektrotexnika va elektronika muhandisligi, arxitektura muhandisligi, kompyuter muhandisligi, energetika va kimyo muhandisligi boʻyicha malakali mutaxassislar tayyorlanadi.

– Bizda birinchi kursda umumiy fanlar oʻqitilib, maktab dasturi qaytariladi, – dedi Shavkat Mirziyoyev. – Yoshlar bir yil umrini yoʻqotib, qiziqishi soʻnib ham qoladi. Rivojlangan davlatlarda bunday emas, birinchi yildan mutaxassislik fanlariga oʻtib, amaliyotga muhim oʻrin beriladi. Natijadagi farqni hayot koʻrsatib turibdi.

Mutasaddilarga Janubiy Koreya universitetlaridagi oʻquv dasturlari va soatlarini oʻrganib, mamlakatimiz oliy taʼlim tizimini qayta koʻrib chiqish, talabalarni amaliyotga maksimal yoʻnaltirish boʻyicha koʻrsatmalar berildi.

Shu bilan Oʻzbekiston Respublikasi Prezidenti Shavkat Mirziyoyevning Fargʻona viloyatiga tashrifi yakunlandi.

 

OʻzA
OʻZBEKISTON RESPUBLIKASI PREZIDENTINING FARMONI
OʻZBEKISTON RESPUBLIKASIDA 2022 YILDA AHOLINI ROʻYXATGA OLISHNI OʻTKAZISH KONSEPSIYASINI TASDIQLASH TOʻGʻRISIDA
Click to listen highlighted text! Powered By GSpeech