Qashqadaryo viloyat statistika boshqarmasida “Call centre” tashkil etilgan. Murojaat uchun telefon: (+998 71) 230-83-94.

KORRUPSIYAGA QARSHI KURASH

TADBIRKORLAR UCHUN

Qonun Davlat statistikasi qoʻmitasi tomonidan Oʻzbekiston Respublikasi Prezidentining “Oʻzbekiston Respublikasida 2022-yilda aholini roʻyxatga olishni oʻtkazish konsepsiyasini tasdiqlash toʻgʻrisida” 2019-yil 5-fevraldagi Farmonini ijro etish maqsadida ishlab chiqilganligi taʼkidlandi.
Soʻzga chiqqanlar Qonunning maqsadi aholini roʻyxatga olish sohasidagi munosabatlarni tartibga solishdan iborat ekanligini qayd etdilar. Aholini roʻyxatga olish – bu Oʻzbekiston Respublikasining aholisi toʻgʻrisida ishonchli va xolis axborot yigʻishdir. Aholini roʻyxatga olishning asosiy prinsiplari quyidagilardan iborat: davriylik; umumiylik va bir paytdalik; roʻyxatga olishning yakka tartibdaligi (nomma-nomligi); shaxsga doir maʼlumotlarning maxfiyligi; aholini roʻyxatga olishni boshqarishning markazlashtirilganligi.
 
Qonunda aholini roʻyxatga olishning quyidagi asosiy vazifalari belgilanmoqda: oilalarga yordam koʻrsatish boʻyicha chora-tadbirlarni ishlab chiqish maqsadida aholi tarkibidagi, demografik vaziyatdagi oʻzgarishlarni baholashga doir maʼlumotlar bazasini kengaytirish; aholining sogʻligʻini mustahkamlash, xotin-qizlar va bolalar uchun shart-sharoitlarni yaxshilash, shaharlarni va boshqa aholi punktlarini ijtimoiy-iqtisodiy rivojlantirishning, mehnat resurslarini joylashtirish hamda ulardan foydalanishning uzoq, oʻrta va qisqa muddatli prognozlari hamda dasturlarini tayyorlash; aholini roʻyxatga olishlar oraligʻidagi davrda aholi soni va tarkibining joriy hisobini, hisob-kitoblarini hamda prognozlarini amalga oshirish; ijtimoiy-iqtisodiy rivojlantirish masalalari boʻyicha ilmiy tadqiqotlarni amalga oshirish.
 
Aholini roʻyxatga olish sohasini davlat tomonidan tartibga solish Vazirlar Mahkamasi, Oʻzbekiston Respublikasida aholini roʻyxatga olishni oʻtkazishga koʻmaklashish boʻyicha respublika komissiyasi, aholini roʻyxatga olish sohasidagi maxsus vakolatli davlat organi – Oʻzbekiston Respublikasi Davlat statistika qoʻmitasi, shuningdek mahalliy davlat hokimiyati organlari tomonidan amalga oshiriladi. Bundan tashqari, ularning bu sohadagi vakolatlari ochib beriladi.
 
Shu bilan birga, vazirliklar, davlat qoʻmitalari, idoralar, fuqarolarning oʻzini oʻzi boshqarish organlari va nodavlat notijorat tashkilotlarining aholini roʻyxatga olishdagi ishtiroki nazarda tutilmoqda, shuningdek respondentlar va roʻyxatga oluvchi xodimlarning huquq hamda majburiyatlari ochib berilmoqda.
 
Senatorlar taʼkidlaganidek, qonun qabul qilinishi xalqaro standartlarga javob beradigan, aholini roʻyxatga olish sohasidagi munosabatlarni tizimli va kompleks tartibga soladigan moslashuvchan va ochiq-oshkora huquqiy doiralarni yaratishni davom ettirishga hamda bir qator dolzarb vazifalarni bajarishga koʻmaklashadi. Jumladan, aholi tarkibida yuz bergan global oʻzgarishlarni baholash, demografik siyosatni, odamlar salomatligini mustahkamlash, xotin-qizlar va bolalar holatini yaxshilash, shuningdek Barqaror taraqqiyot milliy maqsadlarini shakllantirish va monitoring qilish kabi vazifalarni bajarish taʼminlanadi. qonun senatorlar tomonidan maʼqullandi.
 
 
OʻzA

Prezident Shavkat Mirziyoyev 28-fevral kuni poytaxtimizning Mirzo Ulugʻbek tumani Avayxon mahallasida bunyod etilayotgan koʻp qavatli uy-joylarni koʻzdan kechirdi.

Bu yerda jami 1 ming 120 ta xonadondan iborat 17 ta koʻp qavatli uylar qurilishi loyihalashtirilgan. Bugungi kunda 5 ta turar joy qad rostlab, ichki pardozlash ishlari olib borilmoqda.

Davlatimiz rahbari xonadonlardan birini kirib koʻrdi, uylarning qurilish texnologiyasi va energiya tejamkorligiga eʼtibor qaratdi.

Tashqi devorlar bazalt materiali bilan qoplangani ob-havo taʼsirini kamaytirib, xonadonlarning qishda isiq, yozda salqin boʻlishini taʼminlaydi. Yana bir samarali tomoni – bu toʻliq mahalliylashtirilgan mahsulot.

Prezidentimiz mahalliy materiallarni koʻproq ishlatib, uylarning narxini arzon qilish, ularni turli soha vakillari bilan birga kam taʼminlanganlarga ham ajratish boʻyicha koʻrsatmalar berdi. Kredit muddatini uzaytirish, ijaraga berish orqali kambagʻal oilalarni qoʻllab-quvvatlash muhimligini taʼkidladi.

- Shaharlarda odamlar kommunal xizmatlar sifatsizligidan norozi. Binolarni ekspluatatsiya qiladigan barqaror tashkilotlar, malakali kadrlar yetishmaydi. Yangi obyektlar eski tarmoqlarga ulab qoʻyiladi. Butun kvartal birdaniga uzoqdagi stansiyadan isitiladi. Aslida, aql bilan qilinsa, kommunal toʻlovlarni 50 foizgacha arzonlatish mumkin, - dedi Shavkat Mirziyoyev.

Yangi mavzeda avtonom issiqlik stansiyasi qurish, imoratlarni ekspluatatsiya qiladigan va sifatli xizmat koʻrsatadigan zamonaviy shirkat tashkil etish boʻyicha koʻrsatma berildi.

Hududda yana bir nechta 9, 16 va bitta 25 qavatli turar joy barpo etilishi rejalashtirilgan. Loyihada zamonaviy qurilish normalari bilan birga milliy qadriyatlarimiz, turli marosimlar uchun qulayliklar ham inobatga olingan. Barcha uylarni 2020-yil sentyabrda foydalanishga topshirish moʻljallangan.

Shuningdek, maktab, bolalar bogʻchasi, dam olish va sport maydonchalari, bolalar oʻyingohlari, koʻp qavatli avtoturargoh barpo etilishi loyihalashtirilgan.

O'zA

Oʻzbekiston Respublikasi Prezidenti Shavkat Mirziyoyev raisligida 27-fevral kuni tadbirkorlikni rivojlantirish orqali kambagʻallikni qisqartirishga qaratilgan chora-tadbirlar boʻyicha videoselektor yigʻilishi boʻlib oʻtdi.

Maʼlumki, har qanday mamlakatda aholining kam taʼminlangan qatlami mavjud. Oʻzbekistonda ham odamlarning muayyan qismi yetarli daromad manbaiga ega emas.

Xalqimiz farovonligini oshirish maqsadida “Har bir oila – tadbirkor”, “Yoshlar – kelajagimiz”, “Obod qishloq”, “Obod mahalla”, tomorqani rivojlantirish kabi dasturlar qabul qilindi. Oʻtgan ikki yil davomida birgina oilaviy tadbirkorlikni rivojlantirish dasturi doirasida byudjetdan qariyb 10 trillion soʻm imtiyozli kreditlar ajratildi. Albatta, bu aholi bandligini taʼminlash, oilalar uchun daromad manbai yaratishga xizmat qildi.

Kambagʻallik yurtimizda koʻp yillar “yopiq mavzu” boʻlib keldi. Joriy yil 24-yanvar kuni Oliy Majlisga Murojaatnomada davlatimiz rahbari bu haqda ochiq-oydin gapirdi va tariximizda birinchi marta kambagʻallikni qisqartirish ustuvor vazifa sifatida belgilandi.

Bugungi videoselektor yigʻilishida shu boradagi ishlarni tizimli tashkil etish masalalari muhokama qilindi.

– Dastlabki hisob-kitoblarga koʻra, 12-15 foiz yoki 4-5 million aholimiz kambagʻal. Bu ularning bir kunlik daromadi 10-13 ming soʻmdan oshmayapti, degani. Yoki bir oilada mashina ham, chorva ham boʻlishi mumkin, lekin bir kishi ogʻir kasal boʻlsa, oila daromadining kamida 70 foizi uni davolatishga ketadi. Xoʻsh bunday oilani oʻziga toʻq deyish mumkinmi? Prezident sifatida meni odamlarimizning ovqatlanishi, davolanishi, bolalarini oʻqitishi, kiyintirishi kabi hayotiy ehtiyojlari nima boʻlayapti, degan savol har kuni qiynaydi, – dedi Shavkat Mirziyoyev.

Ijtimoiy himoyaga muhtoj va kam taʼminlangan oilalarni qoʻllab-quvvatlash, aholini tadbirkorlikka keng jalb qilish borasidagi ishlarni samarali amalga oshirish maqsadida Prezidentning 2020-yil 18-fevraldagi farmoni hamda qaroriga muvofiq, Mahalla va oilani qoʻllab-quvvatlash vazirligi tashkil etildi. Mahalla – tuman (shahar) – viloyat – respublika darajasida tadbirkorlikni rivojlantirish va kambagʻallikni kamaytirishga masʼul lavozimlar joriy qilinib, vertikal tizim yaratildi.

Shuningdek, kuni kecha Bosh vazirning moliya-iqtisodiyot va kambagʻallikni qisqartirish masalalari boʻyicha oʻrinbosari lavozimi hamda hukumatda alohida kotibiyat tashkil etildi.

– Kambagʻallikni kamaytirish oylik yoki nafaqa miqdorini koʻpaytirish, yoppasiga kredit berish, degani emas. Buning uchun, eng avvalo, aholini kasbga oʻqitish, moliyaviy savodxonligini oshirish, odamlarda tadbirkorlik hissini uygʻotish, infratuzilmani yaxshilash, farzandlarini oʻqitish, sifatli davolanish, manzilli nafaqa toʻlash tizimini joriy qilish kerak, – dedi davlatimiz rahbari.

Shu maqsadda Birlashgan Millatlar Tashkiloti, Jahon banki va boshqa nufuzli xalqaro tashkilotlar bilan kambagʻallikka qarshi kurashishning oʻrta va uzoq muddatli strategiyasi ishlab chiqilmoqda.

Yigʻilishda avvalo har bir mahalla, tuman, shahar va viloyat darajasidagi haqiqiy sharoit va ahvolni tahlil qilish kerakligi qayd etildi. Buning uchun, birinchi yoʻnalishda kambagʻallikka oid real ahvol, yaʼni mahallalardagi daromadi kam oilalar soni haqida maʼlumot yigʻilishi, ikkinchi yoʻnalishda tuman va shaharning salohiyati, tabiiy resurslari, yer va infratuzilma imkoniyatlari xaritasi tuzilishi belgilandi.

– Odamlarning mehnat qilib, boy boʻlishi va yaxshi hayot kechirishi uchun barcha sharoitlarni yaratishimiz zarur, – dedi Prezident.

Qayd etilganidek, tadbirkorlik yaxshi rivojlangan va aholi zich joylashgan hududlar atrofida qishloq xoʻjaligiga moʻljallanmagan va boʻsh turgan yer maydonlarida kichik sanoat zonalari tashkil etiladi. Zarur infratuzilma yaratish uchun Kichik sanoat zonalarini boshqarish direksiyalariga byudjetdan 100 milliard soʻm ajratiladi. Ulardagi yer uchastkalari tadbirkorlarga bozor qiymatida egalik huquqi bilan sotiladi. Ushbu loyiha oʻzini oqlasa, ikkinchi yarim yillikda yana qoʻshimcha 150 milliard soʻm ajratiladi.

Iqtisodiyot va sanoat vazirligiga hokimlar bilan birgalikda yangi kichik sanoat zonalari uchun boʻsh yer maydonlarini aniqlab, infratuzilma bilan taʼminlash vazifasi yuklatildi.

Foydalanishdan chiqib ketgan yerlarni kambagʻal aholiga ajratib berish, zarur joylarda artezian va quduqlar qazish boʻyicha topshiriq berildi.

Aholini tadbirkorlikka oʻrgatish, kasbiy malakasini oshirish orqali kambagʻallikni kamaytirish eng asosiy masala hisoblanadi.

Hozirgi kunda mamlakatimizda rasman ish bilan band boʻlmagan 1 million 400 mingga yaqin ayollar va yoshlar bor. Xotin-qizlar oʻrtasida ishsizlik darajasi 13 foiz, yoshlarda esa 15 foizni tashkil etmoqda. Fargʻona, Samarqand, Andijon, Qashqadaryo va Toshkent viloyatlarida bu koʻrsatkich yuqori.

Shu bilan birga, bugungi kunda qurilishda 104 ming, kommunal sohada 71 ming, xizmat koʻrsatish sohasida 68 ming, yengil sanoatda 46 ming nafar mutaxassisga ehtiyoj mavjud.

Yigʻilishda shu kabi talab bor joylarga malakali mutaxassislar yetkazib berish, bandlikni taʼminlash uchun har bir hududda ishsiz aholini tadbirkorlikka oʻqitish kurslari tashkil etish zarurligi taʼkidlandi.

Oʻqish yakuni boʻyicha Kichik biznesni rivojlantirish agentligi tomonidan tanlov eʼlon qilinib, eng ilgʻor loyiha uchun “startap”ga 20 million soʻm miqdorida grant ajratiladi. Hokimlar ham mahalliy byudjet mablagʻlari hisobidan ilgʻor tadbirkorlik loyihalariga grantlar beradi.

Kasbga oʻqish istagini bildirgan yolgʻiz va koʻp farzandli ayollar, ishsizlar uchun kundalik hayotda ehtiyoj yuqori boʻlgan hunarlar, xususan, tikuvchilik, pazandalik, sartaroshlik va boshqa yoʻnalishlarda kasbga oʻrgatish kurslari tashkil etiladi. Buning uchun mahalla idoralari yoki hududdagi binolardan joy ajratilib, zarur jihozlar bilan taʼminlanadi.

Mahalla va oilani qoʻllab-quvvatlash vazirligiga “Mahalla guzarlarida kasbga oʻqitish dasturi”ni ishlab chiqib, talabgorlar roʻyxatini shakllantirish boʻyicha koʻrsatma berildi.

Qator hududlarda kasbga oʻqitish borasidagi ishlar keskin tanqid qilindi. Jumladan, Qoraqalpogʻistonning 11 tumanida, Buxoro va Toshkent viloyatlarida 9 tadan, Surxondaryoning 7, Jizzaxning 5 tumanida birorta ham bunday markazlar yoʻqligi koʻrsatib oʻtildi.

Kasbga tayyorlash markazlarini tashkil etishga nodavlat tashkilotlarni faol jalb qilish, ular oʻrtasida eng yaxshi kasbga tayyorlash oʻquv dasturi boʻyicha tanlov oʻtkazib, gʻoliblarga Bandlikka koʻmaklashish jamgʻarmasidan grant ajratish boʻyicha topshiriqlar berildi.

Bandlik va mehnat munosabatlari vazirligiga har bir hududda “Ishga marmahat” mono-markazlari hamda kasbga tayyorlash markazlari tashkil etib, ishsizlarga kasbiy bilim va koʻnikmalar, shuningdek, ehtiyojga qarab xorijiy tillarni ham oʻrgatish vazifasi qoʻyildi.

Oilaviy tadbirkorlik dasturlari doirasidagi mablagʻlarning 70 foizi kambagʻal aholiga ish oʻrni yaratishni nazarda tutuvchi kichik va oʻrta biznes loyihalariga yoʻnaltirilishi belgilandi. Shuningdek, kambagʻal kishini ishga olgan korxonalarga bank kreditlari boʻyicha qulayliklar berilishi aytildi.

Axborot texnologiyalari sohasi bir tomondan biznesga koʻmaklashuvchi vosita, ikkinchi tarafdan biznesning alohida yoʻnalishidir. Shu bois oʻzini oʻzi band qilmoqchi boʻlganlarga tushunarli boʻlgan interaktiv mobil ilovalar, barcha savollarga javob beradigan “biznes navigator”lar yaratish zarur.

Savdo-sanoat palatasi, Kichik biznes va tadbirkorlikni rivojlantirish agentligiga tijorat banklari bilan birga sodda tilda tayyor biznes loyihalar ishlab chiqib, odamlarga taklif etish boʻyicha koʻrsatma berildi. Bu biznes loyihalarda xarajat va daromad bilan bogʻliq barcha hisob-kitoblar, ishlab chiqarish quvvatlari, mahsulot miqdori kabi masalalar “ipidan-ignasigacha” aniq boʻladi.

Joylardagi muloqotlar, ommaviy axborot vositalari va ijtimoiy tarmoqlar orqali ushbu loyihalar haqida aholining barcha qatlamiga yetkazish kerakligi qayd etildi.

Savdo-koʻngilochar markazlarni koʻpaytirish hamda koʻchma savdoni rivojlantirish, bu boradagi ortiqcha cheklovlarni olib tashlash boʻyicha takliflar bildirildi.

Kichik biznes va tadbirkorlikni rivojlantirish agentligi, Biznes-ombudsman, Savdo-sanoat palatasi hamda Bosh vazir qabulxonalari davlat va tadbirkor oʻrtasidagi “koʻprik” vazifasini bajarishi, tadbirkorlik tashabbuslarining amalga oshishiga har tomonlama koʻmaklashishi shartligi taʼkidlandi.

Joriy yil 1-martdan boshlab iqtisodiy kompleks idoralari faoliyatini reyting asosida baholash tizimi hamda Hududlarda tadbirkorlik rivojlanishi indeksi joriy etilmoqda. Aholi oʻrtasida ochiq va yashirin soʻrovlar oʻtkazish orqali ularning iqtisodiy kompleks tashkilotlariga boʻlgan munosabati oʻrganib boriladi. Natijalarga qarab, muayyan hududdagi iqtisodiy kompleks rahbarlari faoliyati “namunali”, “yaxshi”, “qoniqarli” va “qoniqarsiz” deb topiladi. Ijobiy baholanganlar ragʻbatlantiriladi va past baho olganlariga jazo choralari koʻriladi. Baholash natijalari bir yilda ikki marotaba Oliy Majlis palatalari, xalq deputatlari viloyat kengashlarida va hukumatda muhokama qilinadi.

Videoselektor yigʻilishida muhokama qilingan masalalar yuzasidan mutasaddilar axborot berdi, tegishli chora-tadbirlar belgilab olindi.

OʻzА

Oʻzbekiston Respublikasi Prezidenti Shavkat Mirziyoyev 26-fevral kuni “Navoiy kon-metallurgiya kombinati” davlat korxonasini isloh qilish masalalari boʻyicha yigʻilish oʻtkazdi.

Mazkur majmua mamlakatimizdagi eng yirik sanoat korxonasidir. Bu yerda oltin, uran, nodir metallar, qurilish va dastgohsozlik sanoati uchun zarur mahsulotlar, keng turdagi xalq isteʼmoli tovarlari ishlab chiqariladi. Kombinat yurtimizdagi jami sanoat mahsulotining 10 foizini va byudjet daromadining 18 foizini taʼminlaydi. Unda 58 ming xodim ishlaydi.

Navoiy kon-metallurgiya kombinati xomashyo resurslarining hajmi boʻyicha jahondagi oltin ishlab chiqaruvchilar orasida uchinchi oʻrinda turadi. Lekin aktivlarining qiymati xorijiy kompaniyalarnikiga nisbatan ancha kam.

Masalan, hozirgi kunda kombinatning balans qiymati 1,3 milliard dollar boʻlsa, shu darajadagi xorijiy korxonalarning bozor narxi 11 milliard dollarni tashkil etadi.

Shu bois NKMKni zamonaviy kompaniyaga aylantirish maqsad qilingan. Davlatimiz tomonidan bu borada kompleks chora-tadbirlar koʻrilmoqda. Xususan, Navoiy kon-metallurgiya kombinatini 2026-yilgacha rivojlantirish dasturi izchil amalga oshirilmoqda. Uning doirasida 2017-2019-yillarda 1,2 milliard dollar mablagʻ evaziga 8 ta obyekt ishga tushirilgan. Natijada oxirgi uch yilda oltin ishlab chiqarish hajmi 2,5 foiz, kumush olish 37 foizga oshgan.

Oʻtgan oyda Oliy Majlisga yoʻllangan Murojaatnomada Prezidentimiz Navoiy kon-metallurgiya va Olmaliq togʻ-kon metallurgiya kombinatlari kabi yirik sanoat korxonalarida yangi investitsion loyihalarni amalga oshirish bilan birga ushbu korxonalarni xalqaro moliya bozorining toʻlaqonli ishtirokchisiga aylantirish lozimligini taʼkidlagan edi.

Yigʻilishda shu boradagi reja va chora-tadbirlar koʻrib chiqildi. Navoiy kon-metallurgiya kombinatining tarkibiy tuzilmasini takomillashtirish, korporativ oshkoralikni tatbiq etish, hisob-kitoblarni xalqaro standartlarga oʻtkazish masalalari muhokama qilindi.

2026-yilga qadar korxonada ishlab chiqarish hajmini 94 tonnaga yetkazish, buning uchun 4 milliard dollarlik 40 ta loyihani amalga oshirish kerakligi taʼkidlandi. Jumladan, loyiha qiymati 525 million dollar boʻlgan yangi konni oʻzlashtirish boʻyicha koʻrsatmalar berildi.

Kombinatning bugungi kundagi 3,7 ming tonna oltin zaxirasi xalqaro standartlar asosida baholanib, korxona balansida aks ettirilishi zarurligi belgilandi.

Davlat geologiya qoʻmitasi va Moliya vazirligiga zaxiralarni baholash ishlari hamda moliyaviy hisobotlarni xalqaro meʼyorlarga oʻtkazish vazifasi qoʻyildi. Konlar zaxirasi va kamayishi toʻgʻrisidagi hisobotlar, qazib olish loyihalari boʻyicha maʼlumotlarni Avstraliya kodeksi (JORC Code) asosida tayyorlash muhimligi qayd etildi.

Navoiy kon-metallurgiya kombinatining korporativ yevroobligatsiyalarini chiqarish masalasiga toʻxtalib oʻtildi.

Korxona rahbari va vazirlar yuqoridagi vazifalar ijrosini tashkil etish yuzasidan hisobot berdi.

O'zA

Anqara shahrida 19-fevral kuni Oliy darajadagi Oʻzbekiston–Turkiya strategik hamkorlik kengashining birinchi yigʻilishi boʻlib oʻtdi.

Bu kengash ikki tomonlama munosabatlar tarixida yangi muloqot formatidir. U 2018-yili davlat rahbarlarining Qoʻshma bayonotiga muvofiq tuzilgan.

Kengash oʻz faoliyatini Oʻzbekiston va Turkiya Prezidentlari hamraisligida olib boradi. Siyosat, xavfsizlik va mudofaa, savdo va iqtisodiyot, investitsiya, turizm, energetika, transport va tranzit, qishloq va oʻrmon xoʻjaligi, madaniyat, taʼlim, fan va texnika, innovatsiyalar, sogʻliqni saqlash va boshqa oʻzaro manfaatli sohalardagi hamkorlikni rivojlantirish strategiyasini belgilaydi.

Savdo-iqtisodiy hamkorlik boʻyicha Oʻzbekiston-Turkiya hukumatlararo komissiyasi hamraislari erishilgan natijalar toʻgʻrisida mazkur kengashga doimiy axborot kiritib boradi. Oʻzbekiston tashqi ishlar vazirligi va Turkiya tashqi ishlar vazirligi kengashning muvofiqlashtiruvchi organlari hisoblanadi.

Turkiya Respublikasi Prezidenti Rejep Tayyip Erdogʻan davlatimiz rahbarini tashrifi bilan qutlab, mamlakatlarimiz parlamentlari, davlat idoralari va ishbilarmon doiralari oʻrtasidagi aloqalar mustahkamlanib borayotganidan mamnunligini bildirdi. Turkiya va Oʻzbekistonning qoʻshma loyihalarini har tomonlama qoʻllab-quvvatlashini taʼkidladi.

Oʻzbekiston Respublikasi Prezidenti Shavkat Mirziyoyev mamlakatimiz delegatsiyasiga koʻrsatilayotgan mehmondoʻstlik va cheksiz hurmat uchun Turkiya rahbari va xalqiga tashakkur izhor etdi.
 
– Bu uchrashuv strategik sherikligimiz yuksak bosqichga koʻtarilganining yaqqol ifodasidir. Mamlakatlarimiz oʻrtasida oʻzaro tovar ayirboshlash hajmini yaqin yillarda besh milliard dollarga yetkazishga qaratilgan ustuvor vazifalarni bajarishda ham ushbu kengash, albatta, muhim zamin boʻladi. Biz bugungi yigʻilish natijalarini mustahkamlab, kelgusi yili boʻlib oʻtadigan uchrashuvning kun tartibi va hamkorligimizning asosiy yoʻnalishlari haqida hozirdan oʻylashimiz maqsadga muvofiqdir, – dedi davlatimiz rahbari.

Oʻzbekiston bilan Turkiya hamkorligi, ayniqsa, oxirgi uch yilda ancha jonlandi. Shavkat Mirziyoyevning 2017-yil oktyabrda Turkiyaga hamda Rejep Tayyip Erdogʻanning 2018-yil aprelda Oʻzbekistonga davlat tashriflari oʻzaro siyosiy ishonchni mustahkamlab, samarali hamkorlikka keng yoʻl ochdi.

Izchil muloqotlar va mushtarak intilishlar natijasi hamkorlik rivojida yaqqol namoyon boʻlmoqda. Masalan, 2016-yilda oʻzaro tovar ayirboshlash hajmi salkam 1,2 milliard AQSH dollari boʻlgan boʻlsa, 2019-yilda bu koʻrsatkich 2,5 milliard dollardan oshdi. Bugungi kunda yurtimizda Turkiya investitsiyasi ishtirokida 1300 dan ziyod korxona faoliyat yuritmoqda. 500 million dollarlik investitsiya loyihalari amalga oshirilmoqda.

Transport sohasidagi aloqalar ham rivojlandi. 2019-yilda bu boradagi koʻrsatkichlar avtomobilda 33 foiz, temir yoʻlda 17 foiz, havo yoʻllarida 42 foiz oʻsgan.

Shuningdek, oʻtgan yili Oʻzbekistonga 64 ming turkiyalik sayyoh tashrif buyurgan.

Ikki davlat rahbarlarining qoʻllab-quvvatlashi va yaratilayotgan sharoitlar natijasida hamkorlik koʻlamini yana-da kengaytirish mumkinligi taʼkidlandi.

Yigʻilishda Oʻzbekiston va Turkiya savdo vazirlari soʻzga chiqib, ikki tomonlama hamkorlik rivoji toʻgʻrisida batafsil axborot berdi.

Muzokaralarda mamlakatlarimiz hamkorligiga oid barcha masalalar va ularning yechimlari, istiqboldagi asosiy vazifalar hamda qoʻshma loyihalar kelishib olindi.

Shavkat Mirziyoyev Strategik hamkorlik kengashining navbatdagi yigʻilishini oʻtkazish uchun Rejep Tayyip Erdogʻanni Oʻzbekistonga taklif qildi.

O'zA
OʻZBEKISTON RESPUBLIKASI PREZIDENTINING FARMONI
OʻZBEKISTON RESPUBLIKASIDA 2022 YILDA AHOLINI ROʻYXATGA OLISHNI OʻTKAZISH KONSEPSIYASINI TASDIQLASH TOʻGʻRISIDA