Qashqadaryo viloyat statistika boshqarmasida “Call centre” tashkil etilgan. Murojaat uchun telefon: (+998 71) 230-83-94.

KORRUPSIYAGA QARSHI KURASH

TADBIRKORLAR UCHUN

Anqara shahrida 19-fevral kuni Oliy darajadagi Oʻzbekiston–Turkiya strategik hamkorlik kengashining birinchi yigʻilishi boʻlib oʻtdi.

Bu kengash ikki tomonlama munosabatlar tarixida yangi muloqot formatidir. U 2018-yili davlat rahbarlarining Qoʻshma bayonotiga muvofiq tuzilgan.

Kengash oʻz faoliyatini Oʻzbekiston va Turkiya Prezidentlari hamraisligida olib boradi. Siyosat, xavfsizlik va mudofaa, savdo va iqtisodiyot, investitsiya, turizm, energetika, transport va tranzit, qishloq va oʻrmon xoʻjaligi, madaniyat, taʼlim, fan va texnika, innovatsiyalar, sogʻliqni saqlash va boshqa oʻzaro manfaatli sohalardagi hamkorlikni rivojlantirish strategiyasini belgilaydi.

Savdo-iqtisodiy hamkorlik boʻyicha Oʻzbekiston-Turkiya hukumatlararo komissiyasi hamraislari erishilgan natijalar toʻgʻrisida mazkur kengashga doimiy axborot kiritib boradi. Oʻzbekiston tashqi ishlar vazirligi va Turkiya tashqi ishlar vazirligi kengashning muvofiqlashtiruvchi organlari hisoblanadi.

Turkiya Respublikasi Prezidenti Rejep Tayyip Erdogʻan davlatimiz rahbarini tashrifi bilan qutlab, mamlakatlarimiz parlamentlari, davlat idoralari va ishbilarmon doiralari oʻrtasidagi aloqalar mustahkamlanib borayotganidan mamnunligini bildirdi. Turkiya va Oʻzbekistonning qoʻshma loyihalarini har tomonlama qoʻllab-quvvatlashini taʼkidladi.

Oʻzbekiston Respublikasi Prezidenti Shavkat Mirziyoyev mamlakatimiz delegatsiyasiga koʻrsatilayotgan mehmondoʻstlik va cheksiz hurmat uchun Turkiya rahbari va xalqiga tashakkur izhor etdi.
 
– Bu uchrashuv strategik sherikligimiz yuksak bosqichga koʻtarilganining yaqqol ifodasidir. Mamlakatlarimiz oʻrtasida oʻzaro tovar ayirboshlash hajmini yaqin yillarda besh milliard dollarga yetkazishga qaratilgan ustuvor vazifalarni bajarishda ham ushbu kengash, albatta, muhim zamin boʻladi. Biz bugungi yigʻilish natijalarini mustahkamlab, kelgusi yili boʻlib oʻtadigan uchrashuvning kun tartibi va hamkorligimizning asosiy yoʻnalishlari haqida hozirdan oʻylashimiz maqsadga muvofiqdir, – dedi davlatimiz rahbari.

Oʻzbekiston bilan Turkiya hamkorligi, ayniqsa, oxirgi uch yilda ancha jonlandi. Shavkat Mirziyoyevning 2017-yil oktyabrda Turkiyaga hamda Rejep Tayyip Erdogʻanning 2018-yil aprelda Oʻzbekistonga davlat tashriflari oʻzaro siyosiy ishonchni mustahkamlab, samarali hamkorlikka keng yoʻl ochdi.

Izchil muloqotlar va mushtarak intilishlar natijasi hamkorlik rivojida yaqqol namoyon boʻlmoqda. Masalan, 2016-yilda oʻzaro tovar ayirboshlash hajmi salkam 1,2 milliard AQSH dollari boʻlgan boʻlsa, 2019-yilda bu koʻrsatkich 2,5 milliard dollardan oshdi. Bugungi kunda yurtimizda Turkiya investitsiyasi ishtirokida 1300 dan ziyod korxona faoliyat yuritmoqda. 500 million dollarlik investitsiya loyihalari amalga oshirilmoqda.

Transport sohasidagi aloqalar ham rivojlandi. 2019-yilda bu boradagi koʻrsatkichlar avtomobilda 33 foiz, temir yoʻlda 17 foiz, havo yoʻllarida 42 foiz oʻsgan.

Shuningdek, oʻtgan yili Oʻzbekistonga 64 ming turkiyalik sayyoh tashrif buyurgan.

Ikki davlat rahbarlarining qoʻllab-quvvatlashi va yaratilayotgan sharoitlar natijasida hamkorlik koʻlamini yana-da kengaytirish mumkinligi taʼkidlandi.

Yigʻilishda Oʻzbekiston va Turkiya savdo vazirlari soʻzga chiqib, ikki tomonlama hamkorlik rivoji toʻgʻrisida batafsil axborot berdi.

Muzokaralarda mamlakatlarimiz hamkorligiga oid barcha masalalar va ularning yechimlari, istiqboldagi asosiy vazifalar hamda qoʻshma loyihalar kelishib olindi.

Shavkat Mirziyoyev Strategik hamkorlik kengashining navbatdagi yigʻilishini oʻtkazish uchun Rejep Tayyip Erdogʻanni Oʻzbekistonga taklif qildi.

O'zA
O‘zbekiston Respublikasi Prezidenti Shavkat Mirziyoev 19 fevral kuni tashrif bilan Turkiya Respublikasiga jo‘nab ketdi.
 
Tashrif dasturiga muvofiq, Anqara shahrida oliy darajadagi muzokaralar hamda O‘zbekiston va Turkiya Prezidentlari hamraisligida ikki tomonlama Strategik hamkorlik kengashining birinchi yig‘ilishi bo‘lib o‘tadi.
 
Siyosiy, savdo-iqtisodiy, investitsiyaviy, moliyaviy, transport-kommunikatsiya, ta’lim, madaniy-gumanitar va boshqa ustuvor yo‘nalishlarda hamkorlikning holati va istiqbollari ko‘rib chiqiladi. Shuningdek, mintaqaviy va xalqaro ahamiyatga molik masalalar bo‘yicha fikr almashiladi.
 
Prezidentimiz Shavkat Mirziyoev Turkiyaning yetakchi kompaniyalari rahbarlari bilan uchrashadi, Turkiya Respublikasi Prezidenti kutubxonasi majmuasining tantanali ochilish marosimida ishtirok etadi.
 
O‘zA

18-fevral kuni Oʻzbekiston Respublikasi Prezidenti Shavkat Mirziyoyev hukumatlararo qoʻshma komissiyaning navbatdagi yigʻilishini oʻtkazish uchun amaliy tashrif bilan mamlakatimizda boʻlib turgan Vengriya tashqi ishlar va savdo vaziri Peter Siyyarto boshchiligidagi delegatsiyani qabul qildi.

Davlatimiz rahbari Oʻzbekiston va Vengriya oʻrtasidagi anʼanaviy doʻstlik va koʻp qirrali sheriklik munosabatlari oxirgi yillarda izchil rivojlanib borayotganini katta mamnuniyat bilan qayd etdi.

Turli darajada samarali muloqotlar yoʻlga qoʻyildi. Mamlakatlarimiz oʻrtasidagi tovar ayirboshlash hajmi oʻtgan yil yakunlariga koʻra 45 foizga ortdi. Qishloq xoʻjaligi, oziq-ovqat sanoati, farmatsevtika va boshqa tarmoqlarda qoʻshma loyihalar amalga oshirilmoqda. Taʼlim, madaniyat va turizm sohasidagi almashinuvlar kengaymoqda.

Peter Siyyarto samimiy qabul uchun Oʻzbekiston Prezidenti Shavkat Mirziyoyevga minnatdorlik bildirib, Vengriya Bosh vaziri Viktor Orbanning eng ezgu tilaklarini yetkazdi.

Uchrashuvda ikki tomonlama hamkorlik va mintaqaviy, jumladan, Yevropa Ittifoqi bilan muloqot formatidagi sheriklikning dolzarb masalalari yuzasidan fikr almashildi.

Vengriyaning yetakchi kompaniyalari ilgʻor tajribasi va zamonaviy texnologiyalarini joriy etgan holda qoʻshma investitsiya loyihalarini amalga oshirish hamda ularni moliyalashtirishga alohida eʼtibor qaratildi.

Hududlararo aloqalarni rivojlantirish, bank, transport sohalariga oid dastularni amalga oshirish, yuqori malakali mutaxassislar tayyorlash istiqbollari muhokama qilindi.

Boʻlajak oliy darajadagi uchrashuvlar rejasi ham koʻrib chiqildi.

OʻzА

Oʻzbekiston Respublikasi Prezidenti Shavkat Mirziyoyev raisligida 14-fevral kuni meva-sabzavotchilik klasterlarini samarali tashkil qilish, paxtachilik klasterlari faoliyatini takomillashtirish hamda davlat ehtiyojlari uchun paxta va gʻalla yetishtirish tizimidan bosqichma-bosqich voz kechish masalalari boʻyicha videoselektor yigʻilishi oʻtkazildi.

Qishloq xoʻjaligi iqtisodiyot rivoji, aholi bandligi va daromadlari oʻsishini taʼminlaydigan eng muhim sohalardan biri. Shu bois uni zamon talablari, strategik yondashuvlar asosida taraqqiy ettirish choralari koʻrilmoqda.

Davlatimiz rahbarining 2019-yil 23-oktyabrdagi farmoni bilan Oʻzbekiston Respublikasi Qishloq xoʻjaligini rivojlantirishning 2020-2030-yillarga moʻljallangan strategiyasi qabul qilindi. Oliy Majlisga Murojaatnomada barcha sohalar qatori qishloq xoʻjaligi boʻyicha ham aniq yoʻnalishlar koʻrsatib oʻtildi.

2025-yilgacha mamlakatimiz yalpi ichki mahsuloti hajmini 100 milliard dollar, yillik eksportni 30 milliard dollarga yetkazish maqsad qilingan. Bu koʻrsatkichlarga erishish uchun qishloq xoʻjaligi sohasida ham juda katta rezerv va imkoniyatlar bor.

Meva-sabzavot eksportini tizimli tashkil qilish, mahsulot ishlab chiqaruvchi bilan eksportyor oʻrtasida oʻzaro munosabatlarni toʻgʻri yoʻlga qoʻyish maqsadida meva-sabzavotchilik va uzumchilikda ham klaster tizimi joriy qilinmoqda.

Davlatimiz rahbarining 2019-yil 11-dekabrdagi qarori bilan bu boradagi barcha tashkiliy-huquqiy asoslar yaratib berildi.

Videoselektor yigʻilishida meva-sabzavotchilik va uzumchilik klasterlari faoliyatini samarali tashkil qilishga qaratilgan ustuvor vazifalar muhokama qilindi.

Avvalo, tizimdagi shartnomaviy munosabatlarni toʻgʻri shakllantirish, mahsulot yetishtiruvchi, qayta ishlovchi va eksportchining manfaati, majburiyati hamda javobgarligini aniq belgilash muhimligi taʼkidlandi.

Klasterlar takliflari asosida eksportbop ekinlarni joylashtirib, zarur urugʻlik, koʻchat, mineral oʻgʻit, yoqilgʻi masalasini hal qilish va ularning taʼminotini tizimli yoʻlga qoʻyish boʻyicha koʻrsatmalar berildi.

Joylarda klasterlar faoliyatini samarali tashkil etishga viloyatlar va tumanlar hokimlarining birinchi oʻrinbosarlari shaxsan masʼul etib belgilandi.

Markaziy bank va tijorat banklari rahbarlarining oʻrinbosarlaridan biri meva-sabzavotchilik klasterlarini aylanma mablagʻlar bilan taʼminlash va ular tomonidan ishlab chiqilgan loyihalarni oʻz vaqtida moliyalashtirishga masʼul qilindi.

– Klasterlar faoliyatini yoʻlga qoʻyishdan asosiy maqsad – eksport hajmini oshirish. Buning uchun esa yangi bozorlarni topish kerak. Bozor boʻlmasa, eksport ham boʻlmaydi, klaster tizimi ham yurmaydi. Shuning uchun chet ellardagi talabni muntazam oʻrganib, imkoniyatlardan samarali foydalanish, eksportda izchillikni taʼminlash kerak, – dedi Shavkat Mirziyoyev.

“Oʻzbekoziqovqatxolding” kompaniyasiga tashkil etilayotgan har bir klaster bilan individual ishlab, eksport shartnomalarini chuqur tahlil qilish, aylanma mablagʻlar ajratilishini hisobga olib, qoʻshimcha kontraktlar tuzishga koʻmaklashish vazifasi yuklatildi.

Yigʻilishda viloyatlar hokimlari meva-sabzavot klasterlarini tashkil qilish, bozorbop mahsulotlar yetishtirish va qayta ishlash, eksport hajmi va geografiyasini kengaytirish borasidagi rejalari yuzasidan axborot berdi.

Paxtachilik klasterlari faoliyatini takomillashtirish, davlat ehtiyojlari uchun paxta va gʻalla yetishtirish tizimidan qadamma-qadam voz kechish masalalari ham yigʻilishda batafsil muhokama qilindi.

Prezidentimiz Oliy Majlisga Murojaatnomasida ushbu mahsulotlarni bozor tamoyillari asosida xarid qilish tizimiga bosqichma-bosqich oʻtish zarurligini taʼkidlagan edi.

Maʼlumki, bu boradagi birinchi qadam sifatida qolipli non, un, bugʻdoy, chigit, paxta yogʻi narxi erkinlashtirilgan edi. Bunga puxta tayyorgarlik koʻrilgani natijasida narxlarda keskin oʻzgarish boʻlmadi.

Paxta va gʻallaga davlat buyurtmasini bekor qilish masalasida ham Jahon banki ekspertlari ishtirokida tegishli chora-tadbirlar ishlab chiqildi.

– Bu yil qishloq xoʻjaligida katta islohotlarni boshlayapmiz. Hokimlar bu masalani chuqur tushunib, ichiga kirishlari shart. Endi orqaga yoʻl yoʻq. Qishloq xoʻjaligi ishlab chiqarishini erkinlashtirmasak, manfaatdorlikni oshirmasak, iqtisodiy oʻsish va samaradorlikka erishib boʻlmaydi, – dedi Prezidentimiz.

Yigʻilishda klasterlar faoliyatining samaradorligini oshirish va ularni moliyaviy qoʻllab-quvvatlash masalasi ham atroflicha tahlil qilindi.

Adliya vazirligi hamda Qishloq xoʻjaligi vazirligiga klasterlarning huquq va majburiyatlarini belgilab, ularning faoliyatini tartibga solish yuzasidan koʻrsatma berildi.

Paxta yetishtirishning amaldagi tizimi fermerlar va klasterlar oʻrtasida moliyaviy jihatdan koʻplab savollarni keltirib chiqarmoqda. Bu bir tarafdan paxtani qayta ishlash va tayyor mahsulot ishlab chiqarishga mablagʻ yetishmasligini keltirib chiqarsa, ikkinchidan, paxta yetishtirgan fermer xoʻjaliklari bilan hisob-kitob qilish imkoniyatini cheklab qoʻymoqda.

Shu bois klasterlar moliyalashtirish tizimini takomillashtirish, ularda mahsulot ishlab chiqarish va qayta ishlashni alohida faoliyat turi sifatida kreditlash tizimini joriy etish zarurligi taʼkidlandi.

Paxta-toʻqimachilik klasterlari tashkil etilmagan joylarda paxta tozalash zavodlari negizida fermerlar kooperatsiyalari yoʻlga qoʻyilishi belgilandi.

Bu tajriba Turkiyada oʻzini oqlagan. Ushbu tizimning eng muhim jihati – fermerlar nafaqat paxta xomashyosini, balki uni qayta ishlashdan olingan mahsulotlarni (tola, chigit, shrot, sheluxa) sotishdan ham manfaatdor boʻladi.

Yana bir ahamiyati – paxta yetishtirishda raqobat shakllanadi. Klasterlar va kooperativlar oʻrtasida raqobat boʻlsa, bundan faqatgina fermerlar, yaʼni yer egalari boʻlgan dehqonlar manfaatdor boʻladi.

Paxta va gʻalla yetishtirishda davlat buyurtmasi bekor boʻlsa, ilgarigidek reja ortidan quvish barham topadi. Endilikda hokimlar xalq deputatlari kengashi bilan birga ekin yerlaridan samarali foydalanish va ekin turlarini toʻgʻri joylashtirishga masʼul boʻladi. Ular, shuningdek, qishloq xoʻjaligi infratuzilmasini yaxshilash, irrigatsiya tarmoqlarini taʼmirlash, suv tejovchi texnologiyalarni joriy qilish, ushbu maqsadlarda ajratilayotgan mablagʻlar va subsidiyalardan samarali foydalanish ishlarini tashkil etadi. Dehqonlarga servis xizmatlari koʻrsatish, zararkunandalarga qarshi qurashish, paxta yigʻim-terimida mexanizatsiya darajasini oshirish choralarini ham koʻradi.

Videselektor yigʻilishida gʻalla hosilini gʻamlash masalasiga ham alohida eʼtibor qaratildi.

Qayd etilganidek, gʻallani davlat ehtiyoji uchun majburiy sotib olish tizimidan davlat zaxiralari tizimiga oʻtilmoqda va fermerlarga gʻallani erkin sotish huquqi berilmoqda. Bu masala oziq-ovqat xavfsizligi bilan bogʻliq boʻlganligi bois davlatga majburiy gʻalla sotish tizimi ikki bosqichda bekor qilinishi rejalashtirilgan.

Bu yil yetishtiriladigan gʻalla hosilidan davlat ehtiyojlari uchun sotiladigan hajmi kamaytiriladi. Yaʼni, mamlakatimiz boʻyicha bu yil qoʻshimcha 1 million tonnadan ortiq gʻalla fermerlar ixtiyorida qoladi.

2021-yil hosilidan boshlab esa davlatga gʻalla sotish rejasi toʻliq bekor qilinib, mahsulotni bozor narxlarida sotib olish yoʻlga qoʻyiladi.

Prezidentimiz bu oʻzgarishlarning ahamiyatini alohida taʼkidlab, mutasaddilarga tegishli topshiriqlar berdi.

Yer ajratish borasidagi muammolar koʻrib chiqildi. Sugʻoriladigan maydonlar talon-torojiga chek qoʻyish, har bir qarich yerdan xalq manfaati yoʻlida samarali foydalanish zarurligi koʻrsatib oʻtildi. Shundan kelib chiqqan holda, joylardagi mutasaddilarning masʼuliyati va javobgarligini oshirish yuzasidan tegishli vazifalar belgilab berildi.

Yigʻilishda muhokama qilingan masalalar yuzasidan soha mutasaddilari, hududlar va tarmoqlar rahbarlari axborot berdi.

O'zA

O‘zbekiston Respublikasi Prezidenti Shavkat Mirziyoyev 11 fevral kuni korrupsiyaga qarshi kurashish hamda jamoatchilik nazorati tizimlarini takomillashtirish masalalari bo‘yicha yig‘ilish o‘tkazdi.

 Prezident matbuot xizmatining qayd etishicha, dunyo miqyosida korrupsiya darajasini o‘rganuvchi Transparency International xalqaro tashkiloti indeksida O‘zbekiston oxirgi uch yilda 12 pog‘onaga ko‘tarilgan bo‘lsa-da, hali bu illat barham topmagan.

«Yurtdoshlarimizning fikricha, sog‘liqni saqlash, ta'lim, bank, bojxona, sud, prokuratura, ichki ishlar, kommunal xizmat sohalarida, shuningdek, fuqarolarni ishga qabul qilishda korrupsiya keng tarqalgan.

Misol uchun, tahlillarga ko‘ra, sog‘liqni saqlash tizimidagi xarajatlarning 25-30 foizi samarasiz sarflanmoqda. Ko‘plab sohalarda davlat xaridlarini amalga oshirish tizimi ochiq-oshkora emas», – deyiladi xabarda.

Davlat rahbari Oliy Majlisga yo‘llagan murojaatnomasida korrupsiyaning oqibatlari bilan kurashishdan ko‘ra barvaqt oldini olishga o‘tish kerakligini ta'kidlab, unga qarshi kurashishga mas'ul bo‘ladigan alohida organ tuzishni taklif qilgan edi.

Bugungi yig‘ilishda ushbu yangi tuzilmani tashkil etish masalalari muhokama qilindi.

Korrupsiya darajasi yuqori bo‘lgan sohalarda bu illatdan qutulish bo‘yicha dastur ishlab chiqib, ijrosini tashkil etish yuzasidan ko‘rsatmalar berildi.

«Korrupsiyaga qarshi kurashishning eng asosiy yo‘li – davlat organlari faoliyati va ish jarayonlarini shaffof qilishdir. Bunda eng asosiy e'tiborni ishga olish, davlat xaridlari, ruxsatnoma va litsenziyalar berish kabi jarayonlarda ochiq-oshkoralikni ta'minlashga qaratish lozimligi belgilandi.

Adliya vazirligi va Bosh prokuraturaga Birlashgan Millatlar Tashkilotining Taraqqiyot dasturi bilan hamkorlikda vazirlik, kompaniya va hokimliklarda ichki korrupsiyaga qarshi choralarni ishlab chiquvchi va amalga oshiruvchi «komplayens nazorat» tizimini joriy etish vazifasi qo‘yildi.

Xorijiy ekspertlarni jalb qilgan holda, davlat xizmatchilari mol-mulki va daromadlarini deklaratsiya qilish tiziminining barcha tashkiliy-huquqiy asoslarini ishlab chiqib, amaliyotga kiritish shartligi ta'kidlandi.

Mutasaddilarga xorijiy tajriba asosida korrupsiyaga qarshi kurashish bo‘yicha tuzilmani tashkil etishga doir hujjatlarni ishlab chiqish yuzasidan topshiriqlar berildi. Mazkur tuzilma nafaqat bu borada davlat siyosatini amalga oshirishi va muvofiqlashtirishi, balki korrupsiyaga qarshi kurashishda barcha kuch va vositalarga ega bo‘lishi kerakligi ko‘rsatib o‘tildi», deyiladi rasmiy axborotda.

Yig‘ilishda jamoatchilik nazoratini kuchaytirish va Jamoatchilik palatasini tashkil etish masalasi ham muhokama qilingan.

2020 yilgi davlat dasturi loyihasiga ko‘ra, korrupsiyaga qarshi kurashuvchi yangi organni tashkil etish to‘g‘risidagi prezident farmoni loyihasi 1 mayga qadar ishlab chiqiladi.

 

O'zA

OʻZBEKISTON RESPUBLIKASI PREZIDENTINING FARMONI
OʻZBEKISTON RESPUBLIKASIDA 2022 YILDA AHOLINI ROʻYXATGA OLISHNI OʻTKAZISH KONSEPSIYASINI TASDIQLASH TOʻGʻRISIDA